Main so jaaungaa

abhi baaki hai raat, aur thodaa dhal jaane do main so jaaungaa
abhi baaki hai dard, kaagaz par nikal jaane do main so jaaungaa

abhi to pi bhi nahi hai sharaab, magar nashaa saa ho rahaa hai
behosh hoon main abhi, thodaa sambhal jaane do main so jaaungaa

aansoo aankhon se mere jaane kahaan gum hain, koi bataa de mujhe
main abhi paththar hoon, thodaa pighal jaane do main so jaaungaa

abhi to meraa ji bhi nahi bharaa mohabbat se, kaise so jaaun main
parwaane ko shamaa mein thodaa aur jal jaane do main so jaaungaa

band kar lun aankhen to ek usi kaa chehraa mujhe nazaar aataa hai
mujhse thodaa duur woh guzraa huwaa kal jaane do main so jaaungaa

bahut bhaari bhaari saa lagtaa hai dil par, dard uski judaai kaa
dard ko aaj mere, ban koi haseen ghazal jaane do main so jaaungaa

bahut shor hai abhi behti hui in hawaaon mein, jaane kab shaant ho
abhi toofaan hai, mausam ko thodaa badal jaane do main so jaaungaa