Hamaari kahaani fir adhoori reh gayi

aaj ki yeh shaam fir sindoori reh gayi
aur hamaari kahaani fir adhoori reh gayi.....


kuch yun karwat liyaa zindagi ne hamaare
sab kuch jaise tham saa gayaa ho ek pal mein
raaste alag ho gaye mere tumhaare achaanak
aur hamaare darmiyaan bas doori reh gayi
aur hamaari kahaani fir adhoori reh gayi.....


kuch sunna thaa tumhe shaayad jo hum keh nahi paaye
kuch kehnaa thaa shaayad tumhe jo tum keh nahi paaye
padh liyaa hum dono ne ek dusre ki aankhon ko
aur faasle badhaane ke liye majboori reh gayi
aur hamaari kahaani fir adhoori reh gayi.....


likhne baithaa jab main kahaani apni fir se puraani
ek mod par aake kisi ne chhed diyaa meri yaadon ko
chehraa aa gayaa fir tumhaaraa nazar ke saamne mere
aur dil mein sawaal aayaa ki kyun woh doori reh gayi
aur hamaari kahaani fir adhoori reh gayi......


aaj ki yeh shaam fir sindoori reh gayi
aur hamaari kahaani fir adhoori reh gayi.....