Har shaqs deewaanaa lagta hai

main deewaanaa hoon, mujhe har shaqs deewaanaa lagtaa hai

jis chehre ko bhi dekhun woh jaanaa pehchaanaa lagtaa hai

yun to kisi se ishq nahi hai magar manaa main kaise karun

hans ke koi baat karle to fir wohi mujhe apnaa lagtaa hai

kyaa garmi, kyaa jaadaa, kyaa basant bahaar ki baat karun

lag jaaye jo rog ishq kaa, har mausam suhaanaa lagtaa hai

chaand saa chehraa kisi kaa, kisi ki zulfein baadal jaisi

baarish ke boondon jaisaa kisikaa khilkhilaanaa lagtaa hai

kisi ke hasee ki baat karun yaa kisi ke meethey baaton ki

kyaa bataaun ishq mein to har andaaz aashiqaana lagtaa hai

Kaun ho tum

tum muskuraate ho to muskuraataa hoon main

tumhaare aansoo dekh ro padtaa hoon main

zindagi tham si jaati hai tumhaare bagair

chalti ho tum saath to zindagi chalti hai

humsafar ho tum meri, zindagi ho tum meri

kaise kahun kaun ho tum meri, jaan-e-jaanaa

meri jaanaa jaan lo yeh ki jaan ho tum meri

 

 

tu kareeb hai to yeh jahaan meraa hai
tujhse judaa kuch bhi kahaan meraa hai

tujhse si saansein, tu hi jeewan hai
tere siwaa kaun aur yahaan meraa hai

 

mere mohabbat ki bas itni si kahaani hai

dil mein dard aur aankhon mein paani hai

do dekh rahe hain aap meri haalat aajkal

ek adhuri mohabbat ki hi to nishaani hai

Mujhe jal jaane do

armaano ko zaraa saa machal jaane do

mere dil ko zaraa tum bahal jaane do

sanson ki garmi, woh hothon ki narmi

naa roko mujhe tum, aaj jal jaane do

kholke baahein tumhe seene mein bharlu

khud ko in baahon mein pighal jaane do

nashe mein abhi tak hoon main jaanaa

nashe mein hi ban koi ghazal jaane do

tum chale bhi jaanaa abhi to aayi ho

zaraa saa mujhe tum sambhal jaane do

Unkaa Pyaar

unkaa pyaar kuch is tarhaa hamaare kaam aataa rahaa
gunaah woh karte rahe aur humpar ilzaam aataa rahaa

tadapte rahe hain judaa hoke us haseen chehre se hum
aur har aah ke saath sirf unhi kaa naam aataa rahaa

Hamaari zindagi thahar gayi

saikdon ummeedein is dil mein hi toot kar bikhar gayi

ek use paane ki tamannaa mein hamaari saari umar gayi

kal tak humein apne jeene kaa matlab kahaa karti thi

aaj humko anjaana keh ke apne har waade se mukar gayi

hawaa jo kal tak uskaa haal sunaane aayaa karti thi

woh hawaa bhi aaj kisi aur raah se ho kar guzar gayi

muskaan jo hamaare hothon par sajaa karti thi kabhi

kho gayi hai kahin, ab jaane kahaan gayi, kidhar gayi

jaane kaisaa rog lagaa gayi hamaare dil ko woh, bas

uske chale jaane se hamaari zindagi jaise thahar gayi

yaad jo aayi uski aaj yunhi tanhaa baithe kamre mein

is deewaane ko aaj firse thodaa aur deewaanaa kar gayi

Ho rahaa nashaa hai mujhe

jabse tere ishq kaa rog lagaa hai mujhe
dard bhi lagne lagaa ab dawaa hai mujhe

chhuwaa boondon ne kuch is tarhaa se ab
baarish mein aane lagaa mazaa hai mujhe

behekne lagaa hoon bin piye hi ab to main
kuch ajeeb saa ho rahaa nashaa hai mujhe

apni hi dhun mein jhuum rahaa hoon main
khud kaa naa zamaane kaa ab pataa hai mujhe

Yeh kaisi pyaas hai

meethe se dard kaa koi meethaa saa ehsaas hai
bheeg rahe baarish mein, fir bhi ek pyaas hai

mausam kaa jaadu hai, yaa sirf koi khwaab hai
behti hawaaon mein aaj kuch to baat khaas hai

gaa loon khushi mein, yaa fir main jhoom loon
jo duur tha mujhse kal, woh aaj mere paas hai

kehdoon dil ki baat sabse, yaa fir chup rahun
dil mein hai gudgudi, kuch alag hi mithaas hai

Hum kyaa dekhein

dekh liyaa teri aankhon ko, ab sharaab koi hum kyaa dekhein
dekh liyaa tere hothon ko, ab ghulaab koi hum kyaa dekhein

teraa chehraa hai in aankhon mein, tu hi tu hai har pal mein
hai dekh liyaa tujh ko humne, ab khwaab koi hum kyaa dekhein

teraa chalnaa, teraa hasnaa, har pal teri hi bas baatein hain
tujhse behtar jaan-e-jaan, cheez laajawaab koi hum kyaa dekhein

yeh sach hai, kal tak hamaari aadat thi, padhne ki kitaabon ko
ek padh liyaa jo chehraa teraa, ab kitaab koi hum kyaa dekhein

hamaare andhere is jeewan mein, koi chiraag bankar hai tu aayi
ek tujhse hi ghar roshan hai, ab aaftaab koi hum kyaa dekhein

kyaa ghalat hai, kyaa sahi hai, iskaa humein kuch pataa nahi
hum karne lage mohabbat tujhse, ab hisaab koi hum kyaa dekhein

dekh liyaa teri aankhon ko, ab sharaab koi hum kyaa dekhein
dekh liyaa tere hothon ko, ab ghulaab koi hum kyaa dekhein

mere mohabbat ki bas itni si kahaani hai

dil mein dard aur aankhon mein paani hai

do dekh rahe hain aap meri haalat aajkal

ek adhuri mohabbat ki hi to nishaani hai

Muskuraataa hoon main

apni bebasi pe aksar muskuraataa hoon main

dekh uski tasveer usko bhulaataa hoon main

kehne ke liye kehtaa hoon koi ghum nahi hai

apne aansoo zamaane se chhipaataa hoon main

koi aashiyaanaa kabhi banaaun bhi to kaise

ek tuta huwaa khandar nazar aataa hoon main

hawaa ki aadat hai shaayad bujhaa jaane ki

roshni ke liye jo chiraag jalaataa hoon main

sirf is ummeed se ki koi khushi mile kabhi

bas paththar ko hi poojtaa jaataa hoon main

dard badhke jab aankhon se chhalak jaataa hai

banaake geet mehfilon mein sunaataa hoon main

Mujhe apnaa tum banaao naa

aao naa, jaanaa aao naa, aa ke seene se lag jaao naa

jaanaa ! apne is deewaane ko tum deewaanaa banaao naa

ek aag hai mere seene mein ab usko tum bujhaao naa

zaraa de kar hawaa mohabbat ki usko tum sulgaao naa

aadat si ho chuki hai ab to tumhaare khushboo ki

apni aadat lagaake mujhe mujhse duur tum jaao naa

paagal paagal aankhon se tum paagalpan badhaate ho

paagalpan ko mere tum hadd se zyaadaa badhaao naa

silwate mere chaddar ki raat kaa haal bayaan karti

kaise tum bin tadpaa hoon, tum aur mujhe tadpaao naa

failaakar baahein apni kabse yahin khadaa hoon main

aakar kareeb ab mere tum mere dhadkan ko chhoo jaao naa

tum bin to tanhaa hoon, tum bin kuch bhi nahi hoon main

tum sangh jeenaa marnaa hai, mujhe apnaa tum banaao naa

kyun itni dur dur ho tum, kyun darmiyaan yeh doorie hai

jo baat tumhaare dil mein hai, woh baat mujhe bataao naa

bas ek baar yeh keh do ki tumko 'Hriday' se mohabbat hai

yun dil mein apni baat dabaakar mujhko tum tarsaao naa

kabse tadap rahaa hoon main, kabse taras rahaa hoon main

tum bechain is dil ko mere thodi thandak to pahuchaao naa

aao naa, jaanaa aao naa, mere seene se lag jaao naa

jaanaa ! apne is deewaane ko tum deewaanaa banaao naa

Mujhe kyaa ho gayaa hai

ek boond aankhon se mere kahin kho gayaa hai

kyaa bataaun yaaron, mujhe kyaa ho gayaa hai

jagaake rakhaa thaa kai barson se jise maine

woh khwaab bhi mere aankhon mein so gayaa hai

tadap rahaa thaa main baarish ki boond ke liye

aaj baarish mere har ehsaas ho bhigo gayaa hai

Tum mile ho

bankar ek khoobsoorat sach mujhe tum mile ho

woh mere karam hi honge jo mujhe tum mile ho

khwaahish thi ki haseen saa ho meraa humsafar

khwaahish thi ki mujhe chaahe meraa humsafar

chaahaa to kuch bhi nahi thaa isse zyaadaa

bankar haqeeqat zindagi ki mujhe tum mile ho

bankar ek khoobsoorat sach mujhe tum mile ho

sun tumhaari baatein kaano mein misri ghul jaati hain

dekh tumhaari aankhein hum paagal se ho jaate hain

yun to kisi chehre par nazar tiki hi nahi aaj tak

bankar ek khoobsoorat humsafar mujhe tum mile ho

bankar ek khoobsoorat sach mujhe tum mile ho 

naa karo ilaaj meraa, ab mujhe bimaar rehne do

jo hai hawaaon mein, ab woh khumaar rehne do

jaante hain hum ki tumhe mohabbat nahi hum se

jhootaa hi sahi magar ab woh aetbaar rehne do

tum baithi raho saamne aur yeh waqt thahar jaaye

baahon mein leke tumhein yeh zindagi guzar jaaye

dekhle kabhi chaand jo tumhaare haseen chehre ko

bhool jaaye aasmaan aur woh zameen par utar aaye

Ankhon mein nami si rahi

zindagi mein mere khushiyon ki kuch kami si rahi

hothon par muskaan aur aankhon mein nami si rahi

they aankhon mein bahut magar dhundle nazar aaye

mere khwaabon par mitti ki ek parat jami si rahi

badal jaane ki aadat to rahi mausam ki hameshaa

baat ajeeb hai yeh aadat uski bhi aadmi si rahi

khushi mili bhi kabhi to mujhe khwaab mein mili

jisme har raat haseen aur subah shabnami si rahi

likhnaa chaahaa agar korey kaagaz par maine kuch

khyaal to bahut aaye bas ungliyaan thami si rahi

Mohabbat karne lage hain

chalte chalte raahon par hum thaharne lage hain

ek alag hi nashaa hai jo ab hum karne lage hain

badi mushkilon se sambhaalaa thaa humne khud ko

beqaraari ki haddon se fir se guzarne lage hain

pankh lag gaye ho hamaare jism mein jaise ab to

kabhi udne to kabhi zameen par utarne lage hain

naa khud ki khabar naa ab kuch bhi pataa humein

kabhi jeene lage hain aur kabhi marne lage hain

kuch to hai zaroor baat badle se is andaaz mein

shaayad fir se kisi se mohabbat karne lage hain

Ab apnaa nahi lagtaa

sangi saathi to bahut hain magar

koi shaqs ab apnaa nahi lagtaa

saath to woh chaltaa hai magar

ab woh aks apnaa nahi lagtaa

aaine ke saamne khade hoke kyaa hogaa

haqeeqat mein kuch hai hi nahi apnaa jab

jo thaa kal tak yahi mere paas meraa apnaa

ban gayaa hai woh khwaab, adhuraa sapnaa ab

Meraa sab kuch tumhaare liye hai

kyaa hai meraa, tum se judaa, tum se alag

tum se hi to meri subah, meri har shaam hai

tumhaaraa chehraa nazar ke saamne hameshaa

dil mein tum, hothon par ek tumhaaraa naam hai

jaantaa hoon main har baat tumhaari

ki main nahi hoon pyaar tumhaaraa

magar kaise bataaun main tumhe yeh

ki tum bin kuch nahi hai meraa apnaa

meri saansein tumhaare liye hain

meri har dhadkan tumhaare liye hai

kyaa hai mere paas aisaa jo tumhaaraa nahi

ragon mein behtaa lahoo tumhaare liye hai

nahi maangtaa main ki tum pyaar karo mujhse

nahi maangtaa main ki jagah do dil mein mujhe

deewaane dil par mere bas itnaa saa ehsaan karnaa

jab tak rahun zindaa bas yunhi kareeb rehne denaa mujhe

 

 

main auron kaa dard to baad mein baant lungaa
pehle mujhe khud to muskuraanaa seekh lene do

desh to main kabhi bhi chalaa saktaa hoon par
pehle dhangse ghar chalaanaa to seekh lene do

Har lamhaa andheraa huwaa

hamaari zindagi mein kuch is tarhaa andheraa huwaa
naa niklaa kabhi suraj aur naa kabhi saweraa huwaa

roshni ki ummeed mein chiraag jalaa to liyaa magar
chiraag ke niche hi to har lamhaa andheraa huwaa

doobne se bachne ke liye kinaare ki taraf bhaage
jahaan kashti pahunchi, wahin paani gehraa huwaa

bhalaa kaise sunaate kisi ko dard ki kahaani apni
hamaare apno ne hi thaa jab humse muh feraa huwaa

toofaan mein pedon ke patte jab jhhad gaye saare
wahaan parindon kaa kahaan kabhi fir baseraa huwaa

likhne jo baithe ghazal to haalat yun rahi hamaari
alfaaz mile bandhe se aur har ehsaas thehraa huwaa

hum maangte rahe duwaa jis se haath uthaa kar woh
thaa bhi nahi meraa aur naa hi kabhi meraa huwaa

Manaanaa aasaan nahi hotaa

gulaab kahin koi khil kahaan paayaa murjhaane ke baad

kashti kabhi koi nikal kahaan paai doob jaane ke baad

haqeeqat aaine ki to har koi jaantaa hai ki kyaa hai

aainaa kabhi jud kahaan paayaa hai toot jaane ke baad

kab tak rok paayenge aansuon ko aankhon mein hum apne

chhalak jaataa hai jaam paimaane se bhar jaane ke baad

nibhaanaa aasaan kahaan hai rishton ko is zamaane mein

manaanaa aasaan nahi hotaa kisi ko rooth jaane ke baad

is zindagi ki kahaani bhi kuch aisi hi hai mere yaaraa

koi apnaa kabhi laut kahaan paayaa chale jaane ke baad

Bewafaa naam milaa

naa sazaa mili, naa hi inaam milaa

kuch is tarhaa kaa mujhe kaam milaa

wafaa nibhaataa rahaa umra bhar

magar bas bewafaa hi ek naam milaa

Tanhaai bolti hai

tanhaa jab rehte hain tanhaai bolti hai

humse to bas hamaari parchhaai bolti hai

kitnaa rote hain hum use yaad kar kar ke

hamaari kahaani hamaari rajaai bolti hai

vaid ko dikhaayen yaa hakeem ko bulaayen

laa-ilaaj hai ishq, har dawaai bolti hai

kyun bhooke pet so jaate hain hum aksar

sachchaai to bas yeh mehengaai bolti hai

ghar kiskaa basaa aur kiskaa ujdaa hai

haqeeqat to sirf woh shehnaai bolti hai

Humein intezaar milaa

naa pyaar milaa, naa hi aetbaar milaa

humko zindagi mein bas intezaar milaa

zindagi kuch yun uljhi hi rahi hamaari

naa kahin chain naa kahin qaraar milaa

Ab woh shahar hamaaraa nahi lagtaa

kuch to hai baat jo ab woh shahar hamaaraa nahi lagtaa
rehte hain hum wahaan par woh ghar hamaaraa nahi lagtaa

hum chalen hain unhi raaston par se jaane kitni ki baar
pehchaanaa lagtaa hai raastaa magar hamaaraa nahi lagtaa

kitne tanhaa huwe hain is zamaane mein hum kyaa bataayein
jo pichhe chaltaa hai woh aks aksar hamaaraa nahi lagtaa

manzil tak pahuchne ke liye saath chale the hum unke kabhi
unke duur chale jaane se ab woh safar hamaaraa nahi lagtaa

log kehte hain hamaari muskaan par hi mar mit_te hain sab
ek baar dil toot jaane se ab woh hunar hamaaraa nahi lagtaa

rishton se bhari duniyaa mein koi kami nahi hai rishton ki
sab hain paas hamaare, koi bhi magar hamaaraa nahi lagtaa

Thode aur dard bhar gaye

raah-e-zindagi ke aise moud par aake thahar gaye

saare rishte kaanch ki tarhaa tootke bikhar gaye

bhool ke apnaa pataa gali gali bhatakte rahe hum

le chali hawaa jidhar humein, hum bas udhar gaye

woh jo kal tak saraankhon par bithaate the humein

hum unki hi nazron se kuch is tarhaa se utar gaye

raat ke andhere mein hazaar waade kiye the jisne

subah hote hi woh apne saare waadon se mukar gaye

woh kuch khaas log jinhe dost kahaa karte the hum

zarurat padne pe woh saare dost jaane kidhar gaye

kharaab mausam ke kaaran woh saath they shaayad

mausam ke theek hote hi woh saare apne ghar gaye

inaam aisaa diyaa hamaari wafaa kaa unhone humein

dard ke samundar mein woh thode aur dard bhar gaye

Waqt ko thahar jaane de

jheel si teri aankhon mein mujhko utar jaane de
jo hai aaj dil mein mere woh mujhe kar jaane de

resham si zulfon ko khol de mere chehre par aaj
karde shaam unhi se aur waqt ko thahar jaane de

naram baahein teri, garam garam saansein ho bas
khud ko baahon mein mere tut ke bikhar jaane de

geele labon pe tere apne labon se ghazal likhdu
naa rok mujhe, aaj mujhe hadd se guzar jaane de

Main sazaa dhundtaa rahaa

jo tum huwe judaa to main
apnaa gunaah dhundtaa rahaa
tum to nikal liye saath chhod
main sazaa dhundtaa rahaa

tum sirf mere the hameshaa se
tum hi yeh samajh nahi paaye
main tumhaari aankhon mein bas
wafaa hi wafaa dhundtaa rahaa

Kahin qaraar kahaan

paagal is dil ko mere ab kahin qaraar kahaan

kisi ki aankhon par ab humein aetbaar kahaan

aadat si ho chuki hai humein aansuon ki aisi

kisi bhi khushi kaa ab humein intezaar kahaan

andheraa bahut hai sooni zindagi mein hamaare

roshani ke liye koi chiraag mere yaar kahaan

badalte mausam ke saath baarish to aayi magar

sukhey ghulaab mein kabhi aayi bahaar kahaan

haathon ki lakeerein yeh bataati hain humein

hai hamaari kismat mein kisi kaa pyaar kahaan

Main jaltaa jaa rahaa hoon

kis aag mein jaane main jaltaa jaa rahaa hoon

mom ki tarhaa main pighaltaa jaa rahaa hoon

hai chain bhi mujhe, bechain bhi main hoon

kaanton bhari raah par chaltaa jaa rahaa hoon

Wafaa dhundtaa hoon

jo tum huwe judaa to main
apnaa gunaah dhundtaa rahaa
tum to nikal liye saath chhod
main sazaa dhundtaa rahaa

tum sirf mere the hameshaa se
tum hi yeh samajh nahi paaye
main tumhaari aankhon mein bas
wafaa hi wafaa dhundtaa rahaa

Main bewafaa hoon

kisi ke bhi kisi baat se
main kahaan khafaa hoon
tum hi yeh samajhte rahe
ki main ek bewafaa hoon

dekh lete baahein failaake
main woh paagal hawaa hoon
jo chhed jaataa tumhe bhi
ek aisaa main nashaa hoon

deewaanaa hoon, paagal hoon
kisi ke liye main mazaa hoon
mere liye to meri jaanaa
main dard bhari ek sazaa hoon

kaun meraa yahaan apnaa hai
kiskaa main sagaa hoon
har shaqs ke liye main bas
dhokhaa hoon, dagaa hoon

Dil meraa bekhabar ho rahaa hai

dekhiye dil meraa mujhse hi bekhabar ho rahaa hai
yaa aapki aankhon ke kaajal kaa asar ho rahaa hai

abhi phoolon ki khushboo se yeh mehekne lagaa hai
dekhiye naa kitnaa haseen meraa ghar ho rahaa hai

aapki jheel si nigaahon ko humne dekhaa hai jabse
jaise humpar har nashaa abhi be-asar ho rahaa hai

jo khwaabon mein aake mere hai mujhe chedd jaataa
badaa khoobsoorat meraa woh humsafar ho rahaa hai

hai jaise chiraagon se kisi ne sajaayaa shahar ko
badaa khushnumaa saa meraa shahar ho rahaa hai

hai mohabbat yeh yaa hai bas hulchul mere dil kaa
yeh kaisaa asar hai jo aajkal mujhpar ho rahaa hai

mere dil ki sab baatein aur shor in dhadkanon kaa
lagtaa hai kuch nahi hai, kuch magar ho rahaa hai

pataa mere ghar kaa jaise mujhe pataa hi nahi ab
dil paagal yeh meraa, paagal is qadar ho rahaa hai

 

Hunar woh meraa thaa

jo neelaam huwaa baazaaron mein, ghar woh meraa thaa

jo barbaad huwaa toofaan mein, shahar woh meraa thaa

kissaa jo sunaayaa mehfil mein, dil ke toot jaane kaa

waah waah to khoob mili, kissaa magar woh meraa thaa

tamaashaa to bahut dekhaa hogaa, logo ne duniyaa mein

khud kaa tamaashaa banaane kaa, hunar woh meraa thaa

shikwaa kyaa karun gairon se, apno ne hi lootaa hai

jisne kiyaa fareb sangh mere, humsafar woh meraa thaa

humko koi dard kahaan, hum duniyaa se yeh kehte hain

takiyaa jiskaa geelaa rahaa, raat bhar woh meraa thaa

Kahin dhunwaa saa lagtaa hai

kahin par to hai aag lagi
kahin dhunwaa saa lagtaa hai
kahin par hai dil tootaa
dard huwaa saa lagtaa hai

resham si raahon par koi
chal kahaan tak paayaa hai
zindagi ke is khel mein ab
har pal juwaa saa lagtaa hai

kabhi khushi kabhi ghum yahaan
kabhi aansuon kaa saagar hai
kabhi kisi ko dekh kar hi
ishq huwaa saa lagtaa hai

kursiyon ki yahaan jung hai
netaa ban gayaa ab har koi
chhoti si ek haar se hi ab
apmaan huwaa saa lagtaa hai

bhaai bhaai kabhi lad pade
to shahar saaraa jal gayaa
kisi ghar mein hai aag lagi
kahin dhunwaa saa lagtaa hai

kahin par hai dil tootaa
dard huwaa saa lagtaa hai
kahin par to hai aag lagi
kahin dhunwaa saa lagtaa hai

Teraa naam le lete hain

tere har gunaah kaa apne sar ilzaam le lete hain
shaam hote hi haathon mein hum jaam le lete hain

bhool jaate hain aksar raastaa apne ghar kaa aur
maikhaane ki taraf ek mod har shaam le lete hain

yun to yaad karte nahi hum tujhe kabhi bhi lekin
apni har saans ke saath teraa naam le lete hain

Tujhko churaa lungaa

teri duniyaa khushiyon se sajaa dungaa
teri wafaa ke badley main wafaa dungaa

jo mehsoos kabhi khudko tu tanhaa kare
tujhe seene se apne main lagaa lungaa

koi poochhe agar jo kahin teri khabar
apne dil mien tujhe main chhipaa lungaa

kahaan dhundegi khud ko tu zamaane mein
jab tujhse hi tujhko main churaa lungaa

Duur jaaye kyun ho

jhooti si baatein tum banaate kyun ho
apnaa banaa ke fir duur jaate kyun ho

hai mohabbat agar to bataa do humein
yeh baat bhalaa tum chhipaate kyun ho

dil to tumhaaraa kuch samajhtaa nahi
bekaar use fir tum samjhaate kyun ho

keh do humse jo dil mein hai tumhaare
kehne se humse tum sharmaate kyun ho

Yun naa sitam kijiye

apni aankhon ko yun naa aap nam kijiye
le kar khushi humse humein gham dijiye

wajan bahaut hai yahaan aapke dard kaa
dekar humein aap ise thodaa kam kijiye

ashq moti ko aankhon se barsaa ke aap
naa is tarhaa hum par aap sitam kijiye

Humein dil mein basaa lijiye

yaa humein dil mein basaa lijiye
yaa fir humein aap bhulaa dijiye

aap yaa to humein apnaa lijiye
yaa fir humein koi sazaa dijiye

aapke bin hum to reh paate nahi
yun duur naa humse rahaa kijiye

aap rehte hain humse khafaa khafaa
aap thodi to humse wafaa kijiye

aap de dijiye humein thodaa zeher
yaa seene se humein ab lagaa lijiye

Apni si kahaani dhundtaa hoon

main har ghazal mein ab apni si kahaani dhundtaa hoon
har kone mein main mohabbat ki nishaani dhundtaa hoon


deewaaron se baatein karke akele hi muskuraa letaa hoon
koi dekh le kabhi to main unse aankhein churaa letaa hoon
log aksar deewaanaa keh dete hain mujhe aadatein dekhkar
chhat ke niche reh kar baarish kaa paani dhundtaa hoon

main har ghazal mein ab apni si kahaani dhundtaa hoon
har kone mein main mohabbat ki nishaani dhundtaa hoon


banaataa hoon ret kaa mahal, woh toot ke bikhar jaataa hai
lamha koi khushi kaa ho bas mujhe chhoo ke guzar jaataa hai
aadat nahi rahi ab to chain se ek pal bhi rehne ki meri
na mile kabhi pareshaani to main pareshaani dhundtaa hoon

main har ghazal mein ab apni si kahaani dhundtaa hoon
har kone mein main mohabbat ki nishaani dhundtaa hoon


yeh haal meraa pehle nahi thaa bas haal hi mein huwaa hai
log kehte hain ki haal nahi haal behaal meraa huwaa hai
mere bachche meri harqaton par haste hain jab kabhi main
unse nazar churaate huwe apni khoyi jawaani dhundtaa hoon

main har ghazal mein ab apni si kahaani dhundtaa hoon
har kone mein main mohabbat ki nishaani dhundtaa hoon


koi kissaa duniyaa ki bheed mein hi kho gayaa hai shaayad
har ehsaas mere dil kaa ab thak kar so gayaa hai shaayad
jab waqt miltaa hai kabhi to kuch panne palat_taa hoon main
kitaab ke panno mein apni cheez koi puraani dhundtaa hoon

main har ghazal mein ab apni si kahaani dhundtaa hoon
har kone mein main mohabbat ki nishaani dhundtaa hoon

yahaan kaun kiskaa hai zamaane mein, kisne pehchaanaa hai
duniyaa ek baazaar hai, yahaan har kisi ko bik jaanaa hai

kyaa huwaa agar thode se ghum mil bhi gaye is duniyaa mein
dard ko sehte jaanaa hai hum sabko aur bas muskuraanaa hai

Koi bataa de humein

aaj fir arse baad kalam ko haathon mein leke

kuch likhne baithaa main unko yaad karke

kore kaagaz par mujhe unki muskaan ko utaarnaa thaa

magar jaane kahaan se tap se ek boond paani kaa

shaayad meri aankhon se niklaa hogaa

mere likhe us kaagaz par aa giraa....

abhi to likhaa bhi nahi thaa kuch maine

bas unke ek naam ke siwaa

aur woh bereham boond paani kaa

mitaa gayaa unke naam ko us kaagaz se

haan thik usi tarhaa se jaise woh mitaa gaye the

hamaaraa naam kuch waqt pehle apni zindagi se...

naa, main yaad nahi kartaa unhe kabhi, magar

kabhi kabhi jab baaarish hoti hai mere shahar mein

jaane kahaan se yaad unki, aa hi jaati hai

aur kuch boond paani ke meri aankhon se

jaane kyun beh jaate hain...

kyaa rishtaa hai ab unse meraa, kisse poochhun

jo har rishtaa mujhse todke duur bahut duur chale gaye

itne duur ki main pahunch hi naa paaun wahaan tak

magar samjhaaun kaise mere is pagal dil ko main

jo ab bhi baatein kartaa rehtaa hai unki tasveer se....

baatein karte karte yunhi akele muskuraa detaa hoon

fir us tasveer ko kitaab ke panno mein chhipaa detaa hoon

kab tak, aakhir kab tak jude rahenge hum us se is tarhaa

kab tootegaa yeh bandhan unse meraa, koi bataa de humein...

koi to ho... jo yeh baat bata de humein...

Jeewan kaa yahi afsaanaa hai

 dard bhari is duniyaa mein
kyaa teraa hai, kyaa meraa hai
socho kyaa lekar aaye the
kyaa lekar waapas jaanaa hai

koi apnaa nahi, koi sapnaa nahi
sapno ko toot hi jaanaa hai
jhooti mooti shaan-o-shaukat
sab yahin chhod ke jaanaa hai

jo saath rahaa woh saathi hai
jo door gayaa woh paraayaa hai
in jhoote moote rishto mein
kisko bandhke reh jaanaa hai

kyaa khonaa hai, kyaa paanaa hai
fir bhi chalte hi jaanaa hai
jeete hain bas yunhi hum sab
jeewan kaa yahi afsaanaa hai

koi paas nahi, koi khaas nahi
apnaa naa koi thikaanaa hai
mitti se hi hum aaye the aur
mitti mein hi mil jaanaa hai...

 

 

laakh  anjaano  mein  ek aur anjaanaa niklaa
jise dost samjhaa,  woh  to  begaanaa niklaa
hum to haqeeqat samajhke jee rahe the use
woh  bhi auron ki  tarhaa  ek afsaanaa niklaa

Main musaafir hoon

hoon bas ek musaafir main
hai kaam meraa chalte jaanaa
ho ghum yaa chaahe khushi ho
bas hai mujhko muskuraanaa

kitne hi mushkilein aati rahein
chaahe kitne bhi ghum ho yahaan
ek waadaa hai khudse
ki hai bas yunhi jeete jaanaa

zindagi bas do pal ki hai
kabhi aansoo hain to kabhi hasi
dhundte hi jaannaaa hai
mujhe khush rehne kaa bahaanaa

kabhi yunhi chalte chalte
zindagi ki raahon mein
koi apnaa saa mil hi jaataa hai
thaam ke haath us ajnabi kaa
kuch pal hi sahi, magar
achcha lagtaa hai saath chalte jaanaa

woh apnaa saa lagne waalaa
chhod bhi jaaye bich raah mein agar
chalte hi jaanaa hai mujhe
aage aur bhi aage zindagi mein
kyunki hoon bas ek musaafir main
kaam hai meraa bas chalte jaanaa.....

Is yug ki kahaani

jo dafn ho gayaa zameen ke niche hamaaraa hi zameer rahaa
numaaish ke liye bachaa sirf insaan kaa nagn shareer rahaa

daulat ki daud mein aaj rishtey is tarhaa toot jaate hain
ki ek hi ghar mein ek bhaai gareeb to ek bhaai ameer rahaa


nafraton mein doobi is duniyaa mein mohabbat kahaan se ho
jahaan chhote chhote bachchon ke haath hi shamsheer rahaa

deewaaron ke pichhe ki baatein, sadkon tak aa hi jaati hain
gairon ko chhodiye, ghar mein rehne waalaa hi mukhbeer rahaa

ummeed to yahi thi ki bachche budhaape kaa sahaaraa banenge
bachchon ki khaatir apnaa sab kuch lutaake baap fakeer rahaa

Dil kahaan samajhtaa hai

bhar dijiye jaam aise ki chhalak jaaye paimaane se

pee len itnaa aaj ki guzar hi jaayen is zamaane se

unki yaadein hain jo jal rahi hain mere seene mein

yeh to woh aag hai jo badhti jaati hai bujhaane se

dil to paagal hai yeh bas paagal saa hi rehtaa hai

kahaan samajhtaa hai yeh kisi ke bhi samjhaane se

kahaan asar thaa aisaa maikhaane mein sharaab mein

hawaa bhi behek jaati thi bas unko chhooke aane se

dard mein doobe ho yaa khoye ho kisi ghum mein hum

khush ho jaate they hum to sirf unke muskuraane se

dard bhi woh the aur har dawaa bhi bas woh hi mere

sukun mil jaataa thaa bas unko seene se lagaane se

ek unke jaane se jaise sab kuch kho diyaa ho humne

log ab kehte hain ki ab hum lagte hain deewaane se

Main gunaah dhundtaa hoon

nafraton ki is duniyaa mein chaah dhundta hoon
main aaj bhi mohabbat bepanaah dhundtaa hoon

bhatkaa musaafir hoon, ek yeh meri kahaani hai
pahunchaa de manzil tak woh raah dhundtaa hoon

nikaalaa gayaa hoon is tarhaa kisi ke dil se
har kisi ke dil mein ab panaah dhundtaa hoon

logo ki nazar mein nafrat ke siwaa kuch nahi
jisme sirf pyaar ho woh nigaah dhundtaa hoon

jaantaa hoon ki hai yeh mumkin nahi, fir bhi
apni har ghazal mein waah waah dhundtaa hoon

apni kahaani kaa andaaz hi alag hai auron se
sazaa to mil chuki, bas gunaah dhundtaa hoon

Woh humse door ho gaye

hum to deewaano mein ab itne mash_hoor ho gaye
jinko bhi chaahaa humne, woh humse door ho gaye

jab kabhi aayi baarish, saath toofaan bhi aayaa
badalte mausamon ke jaise ab yeh dastoor ho gaye

hum jo they gareeb humein to sab haarnaa hi thaa
unko mili daulat to woh usi mein magroor ho gaye

bujhaa kar har chiraag hamaari zindagi kaa woh
kisi gair ki aankhon ke ab to woh noor go gaye

armaan bhi dil ke hamaare jaane guum kahaan huwe
kuch mar gaye shaayad, kuch thak ke choor ho gaye

humein to aadat ho chuki hai nafraton ki
mohabbat se ab to humein dar lagtaa hai

naa kijiye is kadar nafrat humse
ki humein aapse fir mohabbat ho jaaye

teri aankhon mein hum to mohabbat kaa asar dekhte hain
kabhi teri tasveer ko kabhi hum apnaa ghar dekhte hain

Main pyaar kartaa nahi

na dekhun tumhaaraa chehraa to, waqt meraa guzartaa nahi

aur jo tum raho kareeb mere to, waqt yeh thahartaa nahi

maikhaano mein jaa ke maine har nashaa karke dekh liyaa

ek nashaa sirf tumhaaraa hai jo aasaani se utartaa nahi

chaahe main sambhal jaaun, aur chaahe main sudhar jaaun

meraa ek paagal dil hi hai, jo kabhi bhi sudhartaa nahi

saansein to tumse hain ab, dhadkan bhi ab bas tumse hai

naa milti tum mujhe to shaayad, yun be-maut martaa nahi

dartaa hoon main to bas dil ki baat tumhe kehne se apne

poochh bhi loge to main kahungaa, main pyaar kartaa nahi

Deewaana banaao naa

sharbat si aankhon mein tum mishri milaao naa

qaatil husn se apne tum yun teer chalaao naa

jaan par ban aati hai ji, baat ko samjho tum

duur se hum ko dekh kar tum yun muskuraao naa

gulaab ke pankhudi ke jaise, hain lab tumhaare

tum labon se apne mere labon ko chhoo jaao naa

mar hi naa jaayen kahin hum tumko dekh dekh aaj

apni adaaon se hum ko yun deewaanaa banaao naa

baahon mein bharke main jee bharke pyaar karun

aao naa aa kar tum mere seene se lag jaao naa

haaye re meri gulaab ki dukaan, kyaa kahun tujhse
kabhi ek gulaab apne narm haathon se bhi laa deti
jaise muskuraati hai apni tasveer se jhaank kar
kabhi mere saamne bhi aake waise hi muskuraa deti

khwaab aankhon mein sajaate raho
dil ko bas apne samjhaate raho
kahin to milegaa woh humdum tumhaaraa
bas yahi sochke muskuraate raho...

Main hone lagaa hoon firse paagal

dekh tumhaari pyaari hasi, main bhi muskuraane lagaa hoon
kabhi dekh rahaa hoon, to kabhi nazar churaane lagaa hoon
main hone lagaa hoon firse paagal tumhaari mohabbat mein ab
firse woh geet mohabbat ke puraane gungunaane lagaa hoon

kyaa jaadu hai tumhaare chehre mein kisi se kyaa bataaun ab
main khone lagaa hoon nashe mein aur ladkhadaane lagaa hoon
hone lagi hai gudgudi si saare tan badan mein ab to mere aur
tasveer ko hi tumhaare main apne seene se lagaane lagaa hoon

lag rahaa hai aisaa ki chalaa aaun bas daud ke tumhaare paas
fir waqt ki nazaakhat ko samajh khud ko samjhaane lagaa hoon
'Hriday' ko khwaahish thi hi tumhe paane ki barson se lekin
deewaanepan mein apne khud ko ab deewaanaa banaane lagaa hoon

Purono shei din gulo

kokhono kokhono shei din gulo mone pore
jokhon jeebon taa aamaader shohoj chhilo...

shei gaachher niche boshe boshe
thaandaa chhayaa te golpo koraa
tomaar kaadhe maathaa rekhe
maaje modhdhe ghumiye poraa

tomaaro hoye to mone royechhe
purono aamaader shei din gulo
nirob shei raastaa gulo te
tormaar haathe dhore haata feraa

tomaar haate lekhaa chithi
ekhono shonge royechhe aamaar
tomaar kothaa mone porle
aami pori shey gulo ke haajaar baar

tumi hoyeto khushi te royechho
notun shonaar shonshaare tomaar
jaani tumi je firbe naa aar
opekhkhaa tobuo kori tomaar

jekhaane tumi chhede gechhile
shesh dekhaa taa diye aamaaye
aami daariye royechhi shekhaane
shudhu opekhkhaate tomaar.......

Waqt dard aazmaataa rehtaa hai

bhook kabhi jo lagti hai, kisi gareeb ke bachche ko
paththar ko roti samajhke, woh chabaataa rehtaa hai
dekhtaa hai majboor ise, par kar to kuch saktaa nahi
chhip chhip ke bas apne, aansoo bahaataa rehtaa hai


bachchaa maa ki godi mein, jaane ke liye baar baar
chhote chhote haathon ko, apne failaataa rehtaa hai
rassi se bachche ko baandh, maa kaam par nikalti hai
bachchaa ise khel samajhkar, muskuraataa rehtaa hai


kahin bhook, kahin pyaas, kahin maut kaa hai taandav
waqt insaan ke dard ko, yunhi aazmaataa rehtaa hai
kahin chheen naa le mujhse, meri bahu mere bete ko
meri maa ko sirf itnaa hi, dar sataataa rehtaa hai

Tu aur nikharne lagi hai

jabse paagal hawaa tere aangan mein aakar thaharne lagi hai
jaise banke deewaani tu mohabbat mein hi sanwarne lagi hai

deewaane bhi deewaane kehlaane lage hain tere naam se ab to
aur deewaanepan mein mohabbat ke tu aur nikharne lagi hai

yun to aadat nahi thi humein jaane ki maikhaane mein aaj tak
magar banke sharaab tu hi to mere nason mein utarne lagi hai

kasak jab bhi uth_ti hai 'Hriday' mein tere naam ki us pal
banke lahoo tu mere jism kaa mere ragon se guzarne lagi hai

humne to abhi tak chhuwaa bhi nahi hai tujhe meri jaanaa
bas hamaare ehsaas se hi tu ab to toot kar bikharne lagi hai


जबसे पागल हवा तेरे  आँगन में आके ठहरने लगी है
जैसे बनके  दीवानी तू मोहब्बत में ही संवरने लगी है

दीवाने भी दीवाने कहलाने लगे हैं तेरे नाम से अब तो
और दीवानेपन में मोहब्बत के तू और निखारने लगी है

यूँ तो आदत नहीं थी हमें मैखाने में जाने की आज तक
मगर बनके शराब तू ही तो मेरे नसों में उतरने लगी है

कसक जब भी उठती है ह्रदय में तेरे नाम की उस पल
बनके लहू तू मेरे जिस्म का मेरे रगों से गुजरने लगी है

हमने तो अभी तक छुवा भी नहीं है तुझे मेरी जाना
बस हमारे एहसास से ही तू अब तो टूट कर बिखरने लगी है

Dil yeh bimaar hone lagaa hai

naa dehkiye is qadar humein ki humein pyaar hone lagaa hai

aapki farebi aankhon par jaane kyun aetbaar hone lagaa hai

waaqif hain is baat se ki aapki aadat hai dil tod jaane ki

karnaa chaahiye inkaar magar kyun ab iqraar hone lagaa hai

dhadkan kehti hai yeh pyaar hai, dil kehtaa hai jhoot isko

bas is baat par dhadkano kaa dil se takraar hone lagaa hai

baandh ke rakhnaa badaa mushkil hai is paagal dil ko ab to

dekhiye dil meraa ab mere hi seene se faraar hone lagaa hai

sambhaale rakhaa thaa maine khudko ki ho naa jaaye mohabbat

dekhiye naa kaise aap ko dekh dil yeh bimaar hone lagaa hai