Aadat ho gayi hai

mujhe bhi ab un gulaab ke pankhudiyon ko,
apne hothon se chhune ki aadat ho gayi hai,

tumhaare julfon ke ghane chaaon me jaake,
unme gum ho jaane ki aadat si ho gayi hai,

haath jab rakhta hoon apne sharir pe main,
tumhe mehsoos karne ki aadat si ho gayi hai,

maano aaj khamoshi bhi kuch kehti ho mujhse,
tumhaare geet gaane ki chaahat si ho gayi hai,

ye aadat buri hai iska ilm hai mujhe magar,
khudko kharaab karne ki aadat ho gayi hai...

Mil jaunga agle mod pe

aaj jis mod pe haath thaama hai maine tumhaara,
thaama hai ye haath maine duniya chhod kar,

bandha huwa tha main samaaj ke bandhano mein,
aaya hoon tumhare paas wo saare bandhan tod kar,

aaj tak kuch maanga nahi tha maine bhagwaan se,
ab maangi hai tumhaari muskaan usse haath jod kar,

kar lo aetbaar tum meri mohabbat pe kuch is tarha,
ki na jaa paayega ye deewaana kahin tumhe chhod kar,

chhut bhi jaaye kahin saath mera is safar me jeewan ke,
naam mera pukaar lena, mil jaunga tumhe agle mod par...

Har cheez khoobsurat lagne lagi

is safar me zindagi ke hum kuch is tarha mile,
ki humein fir mohabbat karne ki chahat hone lagi,

khoya tumne apne pyaar ko aur khoya maine bhi,
par ab ye kahani fir se wahi puraani lagne lagi,

mere chehre me tum kisi ka chehra dhunda karti,
aur mujhe tumhaari awaaz kisi ki yaad dilaane lagi,

par ab yun aadat padi hai humein ek dusre ki,
mujhe tum me tum aur tumhe mujhme meri jhalak dikhne lagi,

achcha lagta hai main ghanto tumhari awaaz sunta rahu,
aur tumhe bhi mere geeton ki kuch aadat padne lagi,

tadap uth_ti ho tum agar kuch palon ke liye dur rahu,
ab tumhaare dil me fir se mohabbat ki pyaas jagne lagi,

ye khoobsurat sa eksaas tumhaare saath ka rahe umra bhar,
ab tumhaare hone se jahaan ki har cheez khoobsurat lagne lagi....

Dil tanha akele rota hai

ye mohabbat bhi ajeeb ehsaas hai
na to jeene deta hai
na hi marne deta hai
bas tanhaayi me aake tadpata hai

main bhi aksar khoya rehta hoon
aankhen khol ke soya rehta hoon
dard nahi hota hai fir bhi
jaise har pal roya rehta hoon

wo aansoo jo mere dil se behte hain
aksar mujhse yahi kehte hain
ki kyun khud ko tu jalata hai
par ye aansoo behte rehte hain

wo meri hoke bhi meri na ho saki
mujhse dur jaake bhi khush na reh saki
socha karti hai aaj bhi mere baare me
wo meri mohabbat ko bhula na saki

kyun aisa hota hai ki khushi do pal ki
aur dard zindagi bhar ke liye milte hain
kyun dil dard me dooba rehta hai aur
muskuraane k liye wajah nahi milte hain

aasaan hai kisi ko bhi chaah lena
par kyun kisi ko bhulaana mushkil hota hai
bas inhi khayaalon me mera dil khoya rehta hai
aur un yaadon me kho ke tanha akele rota hai.....

Tum kyun pehle nahi mile

tum na milo to kuch kuch adhura sa lagta hai,
tumhaari ek jhalak pe sab poora sa lagta hai,

aadat hai tumhe apne baahon me sulaane ki,
tumhaare bina har khwaab adhura sa lagta hai,

subah tumhaare awaaz ke liye tadapta hoon main,
tum ek baar sweetu keh do to sukoon sa lagta hai,

jab se mehsoos ki hai tumhaare saanson ki mehek maine,
tumhe seene se na laga lu to kuch adhura sa lagta hai,

paana hai tumhe hal haal me, har keemat me,
tumse hi ab har ehsaas poora sa lagta hai,

jab kehti ho tum "kyun pehle nahi mile tum mujhe pyaaru",
kaise bataun tumhe jo mila tha pehle wo adhura sa lagta hai...

Tumko maanga karta hoon

tumhaara hi lahoon banke main tumhaare ragon me hoon,
mehsoos kar ke dekho to main tumhaare saanson me hoon,

jaane ye kaise rishta hai tumse jaane ye kaisa nata hai,
duur tumse hoon main itna par tab bhi lagta kareeb hoon,

jismon ki ye doori hai, par aatma se hum ek hain,
aankhen band karke dekho tumhaara hi sharir hoon,

tumhaari ek hasi ke khaatir kai gunaaah mai karta hoon,
dekh aansoo aankhon me tumhaare ghut ghut k main marta hoon,

tumko hi chaaha hai maine, tumko hi to pooja hai,
apni har duwa me ab to main tumko maanga karta hoon....

Kya tum khud samajh paate ho

samjhaate ho mujhko par kya tum khud samajh paate ho,
kyun aaj bhi tum un khayaalon me kho ke reh jaate ho,

aasaan nahi hota kisi ko chaah ke bhula dena yahaan,
yahi wajah hai ki tum bhi har pal aansoo bahaate ho,

tadapte ho akele tum, dard ko seene me dabaake apne,
chaahte ho mujhe aur mujhse hi har baat chhupate ho,

dekh sakta hoon main tumhaare aansoo tumse dur rehkar,
par har baar tum mujhse bahaane banaake muskuraate ho,

tumhaari har sisak, har ghaaw ka ehsaas hai mujhe,
par tum akele me unhi zakhmon pe namak lagaate ho,

kya milega tumhe khud ko itna tadpaake batao zaraa,
kyun apni chaar din ki zindagi ko yun gawaate ho,

mumkin nahi har khushi mile humein ya haasil apna ho,
kyun nahi sach ko sweekaar kar tum sambhal jaate ho,

samjhaate ho mujhko par kyun nahi khud samajh paate ho,
yunhi har baar un yaadon me kho ke jeete ji mar jaate ho...

Har wo ehsaas hoon

dil ki tere dhadkan banke main tere dil me hoon,
hawa me main khusboo banke tere saanson me hoon,

tanha teri raaton me khwaab ban main aata hoon,
tere kamre me aake tere paas main so jaata hoon,

dur tujhse hoon nahi main tere hi main paas hoon,
mehsus jise karti hai tu main har wo ehsaas hoon...

Usko main manaun kaise

rutha hai mera sanam, usko main manaun kaise,
muskaan uske chehre pe wapas main laun kaise,

har lamha uski yaad me ab rota hai dil mera,
apne is dard-e-dil ko ab main samjhaun kaise,

aankhen uski band hain, dekhna kuch chaahti nahi,
aankhon se behta ye pani usko main dikhaun kaise,

mujhse bahut dur hai wo, sunna kuch chahti nahi,
tute dil ka haal apne usko ab main sunaun kaise,

uspe hi har geet mere, uspe hi hae gazal meri,
uske un geeton ko tanha ab main gungunaun kaise,

kehte hain sab dost mere, aayegi na laut ke wo,
kehta hoon unse bas itna ki usko bhool jaun kaise,

rootha hai wo pyaar mera, usko main manaun kaise,
chahta hoon usko kitna ab usko main bataun kaise...

Parivartan jaruri hai

jeene ke liye parivartan jaruri hai,
tanhaayi me kisi ka saath jaruri hai,
mushkil hota hai dard ko akele sehna,
haathon me kisi ka haath jaruri hai,

poori nahi hoti maangi har duwa apni,
jeene ke liye bas ek aas jaruri hai,
aaj kaale baadal hain to kal suraj hoga,
khushnuma sa bas ek ehsaas jaruri hai,

aansuon se zindagi nahi ji jaati,
jeene k liye muskuraana jaruri hai,
ek khoobsurat geet hai zindagi,
use har pal gungunana jaruri hai...

Koi mil hi jaata hai

kisi ke chale jaane se dukh bahut hota hai,
par uske jaane se saanse nahi tham jaati ye sach hai,

haathon ki lakeeron me hi apni kismat hoti hai,
par bina haath waalon k bhi kismat hoti hai ye sach hai,

kisi ke chale jaane se tanha ho jaate hain hum,
par tanhaayiyon me saaya saath hota hai ye sach hai,

zakham ke chhalon pe jalan to bahut hoti hai,
par wo chhalen jald bhar jaate hain ye sach hai,

ashkon se hum apni duniya sajaa lete hain,
un ashkon ko mitaane waale mil jaate hain ye sach hai,

jaruri nahi ki har duwa maaangte hi poori ho jaaye,
duwa qubool hote hain par unke roop badal jaate hain, ye sach hai,

kisi ka saath chhoot jane se jeene ki ummeed nahi chhoda karte,
zindagi me saath nibhaane ke liye koi mil hi jaata hai, ye sach hai...

Ek ehsaas ne mujhe chheda hai

aaj fir us ehsaas ne aake mujhe cheda hai,
duur hoke bhi tumhaare itne paas hone ka,
darr tumhe paake tumse duur ho jaane ka,

jaane ye kaisa anjaana sa ehsaas hai,
tumhe paane ki ajeeb si pyaas hai,
paa nahi sakta tumhe ye pata hai mujhe,
par fir bhi tumhe paane ki ek aas hai,

samjhaata hoon apne dil ko roz roz main,
par ye mann baawra samajhna hi nahi chahta,
mushkil hai haqeeqat me tumhe paana magar,
ye dil kabhi tumse duur jaana hi nahi chaahta...

(My post number 500)

Mera muskuraana hua

aaj fir se us khidki pe mera thahar jaana hua,
dekh ke tujhe parde me chhipte mera muskuraana hua,

baarish bhi bahut khoob thi, garajte baadal bhi the,
mohabbat ki us baarish me fir tera bheeg jaana hua,

dekh tere bheege badan ko, chunri ko tere bheege huye,
mera khud ko chunri samajh tujhse lipat jaana hua,

aaj tujhko dekh jaise aankh bhi maikhaana hua,
aankhon se tujhko pi bhi liya, mera machal jaana hua,

baarish ki ek boond ko tere hothon pe rukte dekh,
khud ko wo boond samajh tere hothon ko chhuu jaana hua,

aankh teri jhuk si gayi, tera kuch yun sharmaana hua,
jab beheki us baarish me hamaara khidki pe nazar aana hua,

kya kahoon us baarish ka main uska kuch yun aana hua,
bheeg ke us baarish me hi tan badan ka jal jaana hua....

Teri yaad aati hai

dhalti har shaam ke saath teri yaad aati hai,
teri yaad ke saath dhadkan thahar jaati hai,

bhool jaate hain hum har ek gum har ek baat,
jab humein yaadon ki parchhai nazar aati hai,

yaad aati hai humein tere chehre ki maasoomiyat,
aankhon ki wo nami humein aaj bhi yaad aati hai,

takiye ko baahon me bhar tujhe mehsoos karte hain,
teri wo baahon ki narmi humein aaj bhi yaad aati hai,

chumte hain haathon ko apne tera haath samajh ke,
aaj humein tanhaayi me teri bahut yaad aati hai,

sharaabi har shaam me aaj tujh ko yaad karte hain,
mai ke har ek jaam me mujhe bas tu nazar aati hai,

aaj bhi meri dhadkane tujhko yaad karte hain,
likhta hoon koi geet to adhuri hi reh jaati hai...

Teri mohabbat ka deewaana hua

aaj kuch is qadar mehek raha hai saara samaa,
jaane kaise khushboo ka mere ghar aana hua,

har gulaab aaj kuch zyaada hi laal hai,
aur us rang me tere hothon ka rang jaana hua,

samundar me bhi lehren aaj kuch paagal si hain,
aur unke paagalpan me mera bhi behek jaana hua,

dekh ke teri husn ki jaadugari aaj fir se,
mera to aaj khayaalon me kahin gum jaana hua,

likhe the kai geet teri mohabbat k naam humne,
aaj apne hothon se un geeton ka gungunana hua,

kal tak teri muskaan dekh tadapte the hum,
aaj tujhe dekh mere hothon ka muskuraana hua,

tujhe baahon me bhane ki chaahat jaagi hai aaj,
jaane kyun ye paagal aaj fir se deewaana hua,

chumne tere labo ki laali teri or badh jaana hua,
dekh teri madmast jawaani mera to behek jaana hua,

tere chaahat ke samundar me mera to doob jaana hua,
kisi toofaan ka aake mere chaukhat pe thahar jaana hua,

aake meri bahon me aaj tera to pighal jaana hua,
aaj fir se ye dil teri mohabbat ka deewaana hua...

Ghum bhula lete hain

ab to hum tere dard me kho ke ji lete hain,
har ghum ko aansoo me milaake pi lete hain,

har raat chaand me tera chehra dekhte hain,
dekh tera chehra hum kuch pal has lete hain,

bhool jaate hain hum ye ki tu ab meri nahi hai,
tujhe yaad kar hum apne kareeb samajh lete hain,

tanhaayi me kabhi hum tujhpe kuch likh lete hain,
teri yaadon ko hum geeton me gunguna lete hain,

aawaaz teri mujhe sunaai deti hai tanhaayi mein,
hum maikhaane me jaa ke tera ghum bhula lete hain...