Pighalne to do naa

saanson ki garmi mein thodaa aur jalne to do naa

jaadu mohabbat kaa kuch der aur chalne to do naa

yeh baahon ki garmi, haan yeh zulfon ki khushboo

baahon mein aake khudko zaraa pighalne to do naa

kabhi tum sambhaalo, kabhi tumhein hum sambhaalein

kabhi ladkhadaane do, kabhi tum fisalne to do naa

hamaaraa dil to beheltaa hai tumhaare ehsaas se hi

reh ke kareeb dil ko thodaa aur behelne to do naa

yeh geeli si baarish, aur yeh bahaaron kaa mausam

machaltaa hai dil apnaa, thodaa machalne to do naa

chaahat hai is dil ki, bas tumhe paanaa hai jaanaa 

ab is chaahat ko mere dil mein tum palne to do naa

bas abhi to yeh mausam kuch suhaanaa saa huwaa hai

chale jaanaa, tum mausam ko thodaa badalne to do naa

Lajawaab tu hai

dil ke har ek sawaal kaa, sirf ek jawaab tu hai
haqeeqat hai, yaa fir khoobsoorat khwaab tu hai

aankhon mein nashaa tere, jism mein khushboo hai
hothon se lagaaloon jise aisi koi sharaab tu hai

nazar kisi gair ki tujh par kabhi pad naa jaaye
kitaab ke panno mein chhipaa koi ghulaab tu hai

cheez bhalaa kyaa hai tu, kyaa teri taarif ho ab
tujh ko main chaand keh dun, yaa aaftaab tu hai

ragon mein khoon bankar, jism mein hai jaan bankar
dil mein mere rehti hai tu, ehsaas lajawaab tu hai

Tujhe Kyaa Inaam Dun

kyaa tohfaa tujhe main aaj ki haseen shaam dun

keh dun bahaar tujhe yaa main koi aur naam dun

kaanpte geele lab tere jo kareeb aajaayen mere

main un labon ko tere apne labon kaa jaam dun

tadap badh jaaye jab tere dhadkano ki kabhi 

seene se lagaa kar apne main tujhe aaraam dun

umar bhar baithaa rahun tere nazar ke saamne

apni nazron ko bas tujhe dekhne kaa kaam dun

koi haseen ghazal likh dun naam par main tere

yaa bas ishaaron se hi tujhe koi paighaam dun

dene ke liye tujhe chaand bhi tod kar laa dun

tu hi bataa de tujhe main aaj kyaa inaam dun...

Kyaaa kahun

kuch likhaa nahi arse se, aaj kuch likhne kaa mann ho aayaa

liyaa kaagaz kalam haath mein to, chehraa teraa nazar aayaa

maasoom si teri do aankhein, un aankhon kaa kyaa kahun

guzri hain jo teri yaad mein, un raaton kaa kyaa kahun

achchaa lagtaa hai teri tasveer se baatein karte rehnaa

kyaa mazaa hai, kyaa bataaun, un baaton kaa kyaa kahun

bheeg jaataa hoon aksar main tere hone ke ehsaas se hi

main mujhe bheegaane waali un barsaaton kaa kyaa kahun

yaad aati hain ab bhi tujhse hui woh mulaquaatein meri

chhip chhipke tujhse hui un mulaaquaaton kaa kyaa kahun

teraa sharmaanaa, teraa yunhi khilkhilaa kar has denaa

uuufff tujh sangh mehsoos kiye ehsaason kaa kyaa kahun

band aankhon se sirf tujhe hi mehsoos kiyaa har jagah

jab jab dikhaa teraa chehraa un khwaabon kaa kyaa kahun

shuru karun to kabhi khatam hi naa ho woh daastaan apni

dil mein chhipaa teraa naam, teri yaadon kaa kyaa kahun.....

Wish you a very Happy Valentine's Day.

Mujhe mohabbat hai

tum ho nahi khwaab, main yeh kaise aetbaar karun

choo loon tumhe, ki ab kuch aur mere yaar karun

aajaao kareeb, main bhar loon tumhe baahon mein

jee bhar ke tumhi se ab, jaanaa main pyaar karun

kho jaaun ab shaam si ghani zulfon mein tumhaare

doob ke aankhon mein, un aankhon kaa deedaar karun

paagal banaati hain mujhe, nashili aankhein tumhaari

rok loon khud ko, to kabhi khud ko hi beqaraar karun

naam jab bhi aaye meraa, tumhaare naam ke saath aaye

dil kyaa cheez hai, main jaan bhi tumpar nisar karun

poochhte hain log ab wajah mere badle huwe andaaz ki

keh dun mujhe mohabbat hai, yaa ab bhi inkaar karun

Kyaa baat ho

yunhi kabhi chalte chalte woh mil jaayen to kyaa baat ho
zindagi mein fir ek baar unse mulaquaat ho to kyaa baat ho

hum to jee rahe hain hamaari zindagi bas jeene ke liye hi
humein jeene ke liye koi maksad mil jaaye to kyaa baat ho

hawaayein aaj bhi waisi hi hain jaise pehle chalaa akarti thi
magar in hawaaon mein mehek unki ghul jaaye to kyaa baat ho

thak gaye hain hum sooni si deewaaron se baat kar kar ke
koi hamaaraa bhi haal hum se aake poochh le to kyaa baat ho

chal rahe ho hum anjaan kisi raah par aankhein jhukaaye
nazar uthaate hi unkaa chehraa dikh jaaye to kyaa baat ho

khuli zulfen, gulaabi honth, sharbati aankhen nahi maangte
bas ek ehsaas hi ho unke kareeb hone kaa to kyaa baat ho

aadat chhoot gayi hai likhne ki unke chale jaane ke baad
humein fir se koi aake likhnaa sikhaa jaaye to kyaa baat ho

badi sooni hai zindagi hamaari ek unke chale jaane ke baad
kaash woh aake hamaari baahon se lipat jaayen to kyaa baat ho

Main fir deewaanaa huwaa

barson baad jo teri yaadon kaa aanaa huwaa

chhalaktaa saa aankhon kaa paimaanaa huwaa

koshish ki rok len boondon ko aankhon mein

par boondon kaa bas yunhi beh jaanaa huwaa

jinhe dil ke sandook mein band rakhaa thaa

un yaadon kaa, aaj achaanak hi aanaa huwaa

naa koi dastak naa hi koi aawaaz di unhone

aa ke meri khaamoshi ko chhed jaanaa huwaa

yaad aayi woh teri gehri do aankhein humein

un aankhon mein hamaaraa doob jaanaa huwaa 

dhundte rahe hum saahil ko majdhaar mein 

aur saahil se meelon dur chale jaanaa huwaa

khoye kuch is tarhaa hum teri yaadon mein

hamaaraa firse khud ko bhool jaanaa huwaa

khud ko badal ke insaan banne chale the hum

'Hriday' firse tere kaaran deewaanaa huwaa

Dil ki baat

kuch ehsaas dil ke dil mein dabe reh jaate hain
chaahkar bhi hum zubaan tak laa nahi paate hain

kabhi bandhan zamaane ke humein kehne dete nahi
kabhi hum apne andar ke dar se hi dar jaate hain

samjhaate rehte hain dil ko ki wo hamaaraa nahi
dheere dheere haqeeqat se duur chale jaate hain

jisko kabhi dil ki baat bataa paaye hi nahi hum
dekh uski tasveer bas yunhi khush ho jaate hain

Koshish

himmat se log tooofaan mein kaanch kaa mahal banaa lete hain
thodi si koshish se log apnaa sunehraa kal banaa lete hain
ek haar yaa ek jeet ko soch kar zindagi naa guzaaro yaaron
aise bhi hain insaan jo khoobsurat apnaa har pal banaa lete hain...

Kuch aisaa kaam kijiye

deewaane dil par bas itnaa saa ehsaan kijiye
jaate jaate aap mudke humein bas dekh lijiye

aankhon ki masti ko dekh reh lenge raat bhar
aap dil kaa qaraar aur hamaaraa chain lijiye

geele labon kaa nashhaa sharaab se kam kahaan
bas ek baar hothon kaa aap humein jaam dijiye

naa rakhiye baandhkar yun apni ghani zulf ko
kholkar zulfon ko apni din mein shaam kijiye 

deewaane hain hum aapke husn ke jaan-e-jaan
is deewaane pe aap bas itnaa saa ehsaan kijiye

naa jaayaa kijiye humein yun chhodke roz shaam
hum aapke hain, aap hamaaraa haath thaam lijiye

do pal, do ghadi ke saath mein ab mazaa kahaan
zindagi bhar kaa aap humein koi inaam dijiye

chaahe saansen lijiye, lijiye zindagi hamaari
aake hamaari baahon mein dil ko aaraam dijiye

Teri yaadein

tere zulfein yaad aati hain jab bhi yahaan shaam hoti hai
aur har roz hum ghar laut_te un panchhiyon ko dekhte hain
jo sawere chaaron ki talaash mein ghoslon se udd gayi thi
ek ummeed si jagti hai ki ek din tu bhi laut aayegi... ghar apne...

aake fir ek baar meraa yeh ghar, apne rang mein sajaa degi
fir se saweraa waisaa hi hogaa jaisaa huwaa kartaa thaa
jab tu thi, kareeb mere, meri baahon mein, har pal, har lamhaa
jab raat kaa andheraa teri roshni se duur ho jaataa thaa...

yaad to hogaa tujhe bhi, woh haseen se lamhe tere mere saath ke
jab ghanton hum ek dusre kaa haath thaamke baaton mein khoye rehte the
jab waqt kaa pataa hi nahi chaltaa thaa kaise guzar jaayaa karti thi
doobe rehte the hum, guum se rehte the hum ek duje ki aankhon mein...

aksar woh teri khilkhilaati hasi paagal banaa jaati hai mujhe
meri chhoti chhoti baaton ko kitne dhyaan se tu sunti thi
kabhi apne naakhoon ko daanton se kaat_ti, kabhi apni anguthi se khelti
kabhi main chhuu loon teraa haath to kaise sharmaa jaayaa karti thi...

yaad hai naa kaise tu pyaar se mujhse kehti thi 'Chhodo naa'
jab main teri kalaayi apne haathon mein thaam letaa thaa
apnaa chehraa chhipaane ki koshish mein tu kaise laal ho jaayaa karti thi
uuuuuffffff ek ek lamhaa un mulaaqaaton kaa jaise ab bhi jiwit ho...

haan sach hai, bas duur huwe hain hum jismon se, rooh se nahi
ab bhi mere har ehsaas mein tu aakar mujhe cheed jaati hai
din mein, raat men, jo bhi karun main, har us kaam mein tu dikhti hai
har baar mujhe ehsaas dilaati hai ki tu ab bhi kareeb hai... mere paas hai...

jaantaa hoon main ki teri duniyaa alag hai ab, mujhse bahut judaa hai
bas yahi wajah hai ki main kehtaa nahi ki tu aajaa sab chhod ke ... paas mere
magar main bas is ummeed se jeetaa jaataa hoon ki kabhi to fir milegi mujhse
bas ek baar.. bas ek deedaar ke liye main tadaptaa rehtaa hoon.... sach...

duur se hi sahi.. kabhi mujhe nazar aa jaaye.. duniyaa ke kisi kone mein
bas ek jhalak tujhe dekh loon... mehsoos kar loon tujhse fir se ek baar...
dekh loon tujhe to shaayad har shaam fir aisi sooni naa lage.. kuch khaas ho...
ek chehraa teraa... shaam ke rang ko bhi badal degaa.... tere hi rang mein...hai naa...

Mehsoos karke dekho naa

aag bahut hai ab bhi zaraa apni saanson ko chhoo kar ke dekho naa
khaamoshi har baat keh jaati hai tumse, mehsoos kar ke dekho naa
kuch baatein jo dil se zubaan tak aate aate thahar jaati hain
un baaton ko tum apni samundar si aankhon se keh kar ke dekho naa

tumhaari har baat ko tumhaari khushboo se mehsoos kar letaa hoon
jo kahaa nahi aaj tak tumse, aao aaj tumse main woh baat kehtaa hoon
hai mohabbat mujhe tumse is jahaan ke har chehre se badh ke jaanaa
dhadkano par naam tumhaaraa likh ke saans tumhaare naam se hi letaa hoon

Gudgudaa jaati ho mujhe

har baar khwaab me aake tum chhed jaati ho mujhe,
chhupke se aake paagal kar jaati ho tum mujhe,

tanha raat ke tanhaayi me tum aa jaati ho,
meri tanhaaiyo ko dur kar baahon me bhar leti ho mujhe,

har muskuraate chehre me tumhaara hi chehra dikhta hai,
aur apni pyaari muskaan se tum gudguda jaati ho mujhe,

har shabd mera tumse hi shuru hoke tumpe hi khatam hota hai,
tum ho mere geeton me har pal aur bahut yaad aati ho mujhe,

har geet main bas tumhaare hi naam pe to likhta hoon jaana,
bheege hothon pe sajaake tum har baar gunguna jaati ho mujhe...

Pyaar kar loon

ek baar fir se main tujhse milke tujhe pyaar kar loon,
tujhe baahon me bharke main fir se iqraar kar loon,

kahin beet na jaaye ye mausam mohabbat bhara,
tere pyaar ko main jeewan bhar k liye sweekar kar loon,

kya pata kal na rahe ye mausam jaisa aaj hai khila,
aaja mere sanam mere kareeb ki main tera aetbaar kar loon,

chhoo loon hothon ko tere apne kaanpte hothon se,
ki ek baar fir se main apni hasratein poori kar loon,

kho jaun zulfon me main tere aaj kuch is qadar,
thoda khud ko paagal aur thoda tujh ko deewaana kar doon,

aaja meri baahon me aake bikhar ja tu fir ek baar,
tere jism ko khud me lagaake main khud se thoda pyaar kar loon...

 Jaise  huwaa karti thi

haan aaj bhi ye raat waisi hi hai jaisa hua karti thi,
raat me pyaar ki wo baat waisi hi hai jaisa hua karti thi,

aaj bhi mere khwaab me tum mere baahon ke ghere me hoti ho,
angraayi waise hi leti ho jaisa ki pehle liya karti thi,

ye doorie ka ehsaas hota hai jab main aankhen kholta hoon,
band aankhon me mere paas hoti ho jaise pehle hua karti thi,

ye pyaar bhi waisa hi hai, ye khumaar bhi wisa hi hai,
bas doorie jismon ki hai, par dil me aaj bhi ho jaise hua karti thi....

Jeewan

ye jeewan hai kabhi hasati hai to kabhi rulaati hai,
kabhi sukoon deti hai to kabhi bahut sataati hai,

raahi hain hum is jeewan me, humein manzil bulaati hai,
chalna hamaara kam hai, sukh dukh to jeewan ka saathi hai,

mumkin hi nahi ki har lamha bas khushiyon se bharaa,
ek pal pyaar hota hai to kabhi dard bhare geet sunati hai,

ye jeewan hai mere dost, kabhi hasaati hai, kabhi rulati hai,
aur kabhi kabhi hamaare dard ko dekh ye khud muskuraati hai,

ye jaawan hai kabhi hasati hai to kabhi rulaati hai,
kabhi sukoon deti hai to kabhi bahut sataati hai....