Deewaanaa Dil

geeli aankhon ko main chhipaaun kaise
tum hi kaho tumse duur reh paaun kaise

jaankar duur nahi huwaa, majboori thi
kyaa thi majboori tumhe bataaun kaise

jaanti to tum bhi ho naa ki mohabbat hai
meri mohabbat ko main bhulaaun kaise

log poochh lete hain dard ki wajah mujhse
logo ko dard bhari daastaan sunaaun kaise

tumhaari yaad mein dhadaktaa hai dil aaj bhi
in paagal dhadkano ko main ab samjhaaun kaise

kasak hameshaa se rahi hai 'Hriday' mein
ab is uth_ti kasak ko main dabaaun kaise

naa tumhaare paas reh saktaa hoon naa duur
deewaane is dil ko main bhalaa manaaun kaise