Soch apni, samajh apni

main kuch kehta hoon to wo hasee me udaa deti hai,

aur baat baat pe wo mujhe bholaa bhaalaa kehti hai,

main aadi nahi hoon shaharon ke aise chhal kapat ka,

jisse pyaar karta hoon wo pari mere dil me rehti hai,

ye meri kahaani nahi bas ek khayaal hai...ek ladki jo paagal hai is adhunik yug ke rang me dhalne ko aur ek ladka jo ab bhi puraane sanskaaron ka maan karta hai, pyaar mohabbat me vishwaas rakhta hai... bas ek soch... 

koshish to khoob karti hai lubhaane ki apni adaaon se mujhe,

kabhi baahon ke gheron me leti hai to kabhi chumti hai mujhe,

main har baar daant ke use samjhaataa hoon ki hai thik nahi ye,

"zindagi ke maze hain" har baar ye baat wo samjhaati hai mujhe,

kehti hai "kya rakha hai kisi ek ke pyaar me umra guzaarne me,

mazaa to zindagi ka hota hai ghaat ghaat ka paani peene me",

samjhaataa hoon use ki main nahi hoon shayad is yug ka insaan,

mujhe to achcha lagta hai bas apne mehboob ke saath jeene me,

kehti hai mujhe, "mehboob to wo hota hai jo kuch pal saath ho,

koi aisa shaks jiske saath bas do ya chaar gin ke mulaquaat ho",

par kaise samjhaataa main us naasamajh ko ki meri samajh kya hai,

chalo jaane do, samjhe wo wahi jo uski samajh me aati baat ho,

mumkin nahi samjhaanaa har kisi ko mohabbat kya cheez hoti hai,

kisi ke liye dil behlaane ka zariya to kisi ki zindagi hoti hai,

koi waqt pe samajh jaataa hai to koi waqt jaane pe samajhta hai,

kya kahen, ye to har kisi ki apni apni kismat ki baat hoti hai....

Humein kuch na haasil huwa

koshish kar ke dekh liya kai kai baar humein kuch na haasil huwa,

jise apne samjha uske dil me jagah banaane me kabhi na kaabil huwa,

aaye kai log meri zindagi me aake kuch palon ka saath bhi nibhaayaa,

par us pal bhar ke saath se mujhe ghum ke siwa kuch na haasil huwa...

Kya kam hai

kya kahen hum tumse ki humne kya khoya hai

kal bhi kuch hamaara nahi thaa, na aaj hai

ek ummeed ki kiran dikhi thi tum me mujhe

tum aaj nahi ho meri to bhala kya ghum hai

har kisi ko mere haal pe taras aataa hai

nahi aayaa tumko taras to kya ghum hai

paake tumhe paa liya tha saaraa jahaan

aaj tum nahi to pataa chalaa kya kam hai

juda hoke tumse ab kuch achcha lagta nahi

tum ho yaadon me, aur ye aankhen num hain

kehne ko to saaraa jahaan mera hai magar

koi apna nahi mera, na koi hum dum hai...

Wo ek din jaan jaayegaa

tum karti raho mohabbat wo ek din maan jaayega,

tumhaare dil ki haalat wo ek din jaan jaayega,

ek saath dono dilon me ek sa ehsaas ho mumkin nahi,

aaj nahi hai, par wo mohabbat jald pehchaan jaayega...

Tum mujhe kya samajh rahe ho

naa main wo nahi hoon jo tum mujhe samajh rahe ho

main kankad hoon aur tum mujhe kanak samajh rahe ho

chand lamhe saath guzaar ke jaane kya dekha mujhme

jaane kyun tum mujhe apna hum safar samajh rahe ho

tinka hoon hawaa ke saath jaane kahaan chalaa jaaunga

jiska khud ka pataa nahi use apna pataa samajh rahe ho

samundar hai jeewan mera, kinaare ki koi khabar nahi

jaane kyun tum is majhdhaar ko saahil samajh rahe ho

bahaaron ka mere jeewan se duur tak koi rishta nahi

kyun murjhaaye phoolon ko taazaa gulaab samajh rahe ho

mere chehre pe jo muskaan hai uspe mat tum yakeen karo

ye to bas dikhaawaa hai jise tum khushi samajh rahe ho

koi khushi nahi paas mere, bas ghum hi hai har taraf

kyun is veeraane ko tum basaa koi shahar samajh rahe ho

andheraa hai har taraf mere, ujaale ki koi ummeed nahi

main to koi kafan hoon, tum mujhe jeewan samajh rahe ho

naa main wo nahi hoon jo tum mujhe samajh rahe ho

main kankad hoon aur tum mujhe kanak samajh rahe ho...

Tumse milna to bas ek bahaanaa thaa

tumhe bhulaake tumse bahut duur mujhe jaanaa thaa

tumhaari yaadon se duur naya jahaan basaanaa thaa

har nishaani tumhaare pyaar ki mita di maine magar

na mita paayaa wo pyaar jise dil se mitaanaa thaa

wo faislaa duur jaane kaa tumse meraa apnaa thaa

tumse duur rehna hai mujhe dil ko samjhaanaa thaa

ab judaa ho ke tumse tumhaari yaad kyun aati hai

yaad kar rahaa hoon use jisko mujhe bhulaanaa thaa

khush tha main tanhaayion me wo ek zamaanaa thaa

tumse milna to dil behlaane ka ek bahaanaa thaa

kise pataa thaa ki dil hi tumko hum de baithenge

hume to dil behlaake tumse duur chale jaanaa thaa...

Woh

sakhiyon ke sangh har subah meri gali se guzarti hai woh,

jhuki nazron ko uthaake, mujhe dekh muskuraati hai woh,

nazar mil jaaye meri nazron se to sharmaa jaati hai woh,

har baar kaise kaise mere dil me ehsaas jagaati hai woh...

Raat bhar soyaa nahee

dekh meri laal aankhon ko poochha behna ne mere

kyun bhaai 'kya raat bhar ek pal tum soye nahee'

ab kaise bataataa use ki main kahaan khoya tha

jiski yaadon me kho ke main raat bhar soyaa nahee

dekha tha use bus stop pe office se aate samay

dekhta raha use is tarha ki bus pakad paayaa nahee

uske chale jaane par bhi main khoya tha usi me yun

ki ghar to wapas aagaya par usko bhool paayaa nahee

subah ka intezaar tha, fir shaam tak mujhe rukna tha

aayegi is shaam bhi maine khud ko samjhaayaa yahee

subah se lekar shaam tak ek pal chain paayaa nahi

jiska intezaar tha, us shaam wo aayaa nahee

raat ghar jaake mera mann bhi kuch lagaa nahee

uski yaadon me rahaa jisse main mil paayaa nahee

chalo aaj nahee to kal sahee, wo mil jaayegi wahee

na mili jo kal bhi wo to samjhun meri kismat me nahee....

Tumhe chahnaa hai

ye imtihaan hai, isme awwal aanaa hai,

saari hadon se tumhe guzar ke jaanaa hai,

wo tumhe na chaahe abhi, par kab tak,

ek roz use bhi tumko chahnaa hai....

Zaraa

sharbati aankhon me tere doob loon zaraa,

shabnami hothon ko tere chhoo loon zaraa,

kuch na rahe armaan mere is dil me baaki. 

bas ek baar apne seene se lagaa loon zaraa,

dekha hai jabse tujhe bas khayaal ye aayaa,

ki apnaa bana ke tumhe main jee loon zaraa,

saaye ki tarha tere saath rahun umra bhar,

ki khoke teri baahon me main mar loon zaraa... 

Kya rakha hai duur ghar se

chhod ke saath maa papaa ka main aaya tha ghar se,

rupaye dus hazar bachaake main laayaa tha ghar se,

maa ne kahaa beta khat likhna har hafte mujhe tu,

khat kya yaad tak na kiya duur aake maine ghar se,

papaa ne kahaa tha pairon pe apne khadaa hona hai,

koshish aaj tak kar raha hoon aake duur ghar se,

wo rupaye khatam karke ab udhaar me dooba hoon,

aise kar raha hoon main basar jeewan duur ghar se,

koi chaachaa na koi taau hai yahaan daftaro me mera,

kaun yahaan rakhe mujhe kaam pe itni duur ghar se,

apni mehnat se achchi degree li hai maine par,

degree bhi meri lagti hai ab raddi duur ghar se,

kaam usko milta hai jiske rishtedaar ho bade,

bhala kaun yahaan mera hai meelon duur ghar se,

sochta hoon kya faaida yahaan degreeyon ka bhala,

bol baalaa hai yahaan thagi ka duur ghar se,

achcha tha rehta main aanchal se bandhe maa ke,

lagta nahi ab dil mera yahaan duur ghar se,

haath bataaun papaa ka main jaake kheton me,

kya rakha hai shahar me ab itni duur ghar se...

Tumhaaraa saath maanga hai

sahaare ke liye nahi bas saath chalne ke liye saath maangaa hai,

zindagi guzaarne ke liye haathon me tumhaaraa haath maanga hai, 

chot itne khaaye hain maine ki ab to choton ki aadat se ho gayi hai,

maine kisi marham ke roop me nahi bas yunhi tumharaa saath maanga hai,

kisne kaha ki tum kisi kaam ke nahi ho, khud se poochh ke dekho,

tumhaare aankhon me apna kal dekh ke tumhaaraa saath maanga hai,

aaina jhoot kehta hai jise shikayat hai ki tum me kuch baat nahi,

maine tumse zyaadaa tumhe pehchaan ke tumhaaraa saath maangaa hai...

Ab bhi kuch baaki hai

sab kuch to hai mere paas par shayad ab bhi kuch baaki hai,

khushiyon ka mela hai saath mere par shayad kuch baaki hai,

apne hain, rishte hain, dil ki dhadkane bhi waisi hi hain,

par kyun mujhe lagta hai har pal ki ab bhi kuch baaki hai,

koi rishta tha jo tut gaya, koi saath jo kahin chhoot gaya,

ab jeewan ke har ek mod pe lagta hai jaise kuch baaki hai,

arsaa beet gaya usko bhulaaye huye par shaayad bhoola nahi,

uski yaadon ka kuch ansh mere dhadkano ke saath baaki hai,

saath kisi ka kuch lamho ka tha par asar bahut gehra hi tha,

wahi asar hai jiske kaaran har lamha lagta hai kuch baaki hai,

dekhna kabhi jhaank ke mere andhere kamre me kuch na hoga,

par sirf mujhe maaloom hai ki uska saayaa ab bhi baaki hai,

aaj bhi uski khushboo mehsoos karta hoon apne band kamre me,

uske diye gulaab me taazgi aur wo khushboo aaj bhi baaki hai,

din guzarte gaye zindagi ke, kai saal beet gaye uske bina,

jaane kyun usse juda rehke lagta hai kuch khaas baaki hai,

sab kuch to hai mere paas par shayad ab bhi kuch baaki hai,

khushiyon ka mela hai saath mere par shayad kuch baaki hai... 

Main tumhaare saath rahunga

haathon me tumhaaraa haath le ke zindagi guzaar dungaa,

tumhaari aankhon ko dekhte huye har lamha guzaar dungaa,

kabhi tumhe baadal to kabhi main gehra samundar kahungaa,

ghum ho ya khushi har lamha main tumhaare saath rahungaa,

zindagi tumhaari main gulaab ke phoolon se sajaa dungaa,

koi ghum chhoo na sake main koi aisi deewaar bana dungaa,

rok na sakaa khudko to tumhe baahon me main bhar lungaa,

dheere se tumhaare kaano me main har ek baat bol dungaa,

jahaan ki saari khushiyaan tumhaari kadmon pe laa dungaa,

baith tumhaare saamne main apni poori zindagi guzaar dungaa...

Main khush kaise ho sakta hoon

tumne ye kaise soch liya tumse juda ho ke main khush ho sakta hoon,

tumhaare aankhon me nami ho main chain ki neend kaise so sakta hoon,

ye sach nahi hai ki tumse duur reh ke maine bhulaa diya hai tumko,

saath nahi ho tum, tumhaari yaadon ke saaye me tadap to sakta hoon,

kabhi socha nahi tha ki ek din is tarha tanha chhod jaaoge tum mujhe,

khush raho tum, us upar waale se tumhaare liye dua kar to sakta hoon...

Khud ko samjhaayaa

har chot ke baad humne khud ko aur taaqatwar paayaa,
tute huye dil ko apne humne khud hi ye samjhaayaa,
yun kamzor na banaao khud ko koi khel jaaye dilse,
ab tanha rehke humne khud ko fir se muskuraataa paayaa...

Hum kuch aise kaam karte hain

tumhaaraa naam lete hain, kabhi tumhi ko badnaam karte hain,

log humein paagal kehte hain, hum aise kuch kaam karte hain,

kabhi to kehte hain ki bewafaai tumne ki hamaare saath lekin,

ye bhi sach hai, tumhi ko hum yaad subah se shaam karte hain...

Likhna to bas ek bahaanaa hai

tumhaare kareeb rehke naa jaan paaye jitna tumse duur aake jaanaa hai,

sach kahen to tumse juda ho ke hi humne tumhe dhang se pehchaanaa hai,

band aankhon se tumhaari chhavi ko dil me basaayaa tha kabhi humne,

khuli aankhon se dekhaa aaj to jaanaa ki jhootaa saaraa zamaanaa hai,

samjhaayaa bahut tha apno ne humein ki tum apne nahi ho sakte mere,

unke un baaton ka mol tumse judaa ho ke hi humne ab jaanaa hai,

kaun apna hai kaun paraayaa hai samajhne me bahut der lagi humein,

khwaab jhoote the humaare ye un khwaabon ke tutne ke baad jaanaa hai,

likhta hoon dard-e-dil ka haal, par ye likhna to bas ek bahaanaa hai,

kaagaz to bas ek zariyaa hai jisse humein un ghamon ko bhulaana hai,

galti hamaari thi jo bin soche samjhe pyaar kar baithe tumse hum,

tumhaare yaadon ko seene se lagaake is jahaan se guzar jaanaa hai...