Tumhaaraa ho jaane do

bheege labon se mere labon ko bheego jaane do

aaj to hum dono ke darmiyaan kuch ho jaane do

keh do kuch aaj mujhe apni madbhari aankhon se

mujhe tumhaari gehri aankhon mein kho jaane do

taras rahaa hoon main do boond mohabbat ke liye

sar rakh ke tumhaari god mein mujhe so jaane do

kholdo zulfen apni mere chehre pe kuch is tarha

kho jaaun main aur tum khud ko bhi kho jaane do

geeli baarishein bhi ab mazaa nahi deti mujhe

ek baar ke liye hi sahi kuch khaas ho jaane do

todke bandishein saari aake ban jaao tum mere

tanhaa hoon main, mujhe tumhaaraa ho jaane do

Kyaa karenge

jo darte hain unchaai se woh wahaan jaa ke kyaa karenge

dil to paagal dil hai, hum usko samjhaa ke kyaa karenge

rishte tut_te hain jud_te hain kai kai baar jahaan mein

magar jinko jod naa sake kabhi, pachhtaa ke kyaa karenge

Rehne do

mere hothon pe tumhaare hothon kaa gulaab rehne do

mere saamne tumhaare aankhon kaa sharaab rehne do 

badh jaane do bekaraari chaahat ki hadd se zyaadaa

naa sambhaalo tum, ab meri haalat kharaab rehne do

Kyaa tum mujhe aazmaate ho

kabhi khwaab sajaate ho, kabhi haqeeqat ban jaate ho
kabhi duur baithe baithe mujhe dekh ke muskuraate ho

kyaa yeh mohabbat hai yaa hai koi sharaarat tumhaari
kabhi nazar milaate ho, kabhi mujh se hi churaate ho

tasveer tumhaari dekhun to usmein hi kho jaataa hoon
paagal main hoon nahi, magar tum hi mujhe banaate ho

suraj ki kirno mein to kabhi baarish ki boondon mein
tum nazar aate ho, mujhe tum chhoo ke chale jaate ho

kabhi ladkhadaataa hoon to kabhi main sambhaltaa hoon
besudh ho jaataa hoon main, jab tum saamne aajaate ho

baahen failaa ke jab main aawaaz tumhe lagaataa hoon
banke tum koi paagal hawaa mere seene se lag jaate ho

yeh aadat achchi nahi tumhaari humein yun sataane ki
tum khud hi pyaas badhaate ho fir khud hi bujhaate ho

dil se khel jaate ho jaanaa dil mein samaake tum mere
yeh khel hai tumhaaraa koi yaa fir humein aazmaate ho

Naa bhulungaa tumhe

main aaungaa meraa intezaar karnaa

hai vaadaa tumse, tum aetbaar karnaa

chaahe bhulaa de yeh duniyaa tumhe par

naa bhulunga kabhi main tumhe pyaar karnaa

Tumhe laajawaab kehne do

naa sambhaalo mujhe ab, meri haalat kharaab rehne do

naa roko mujhe ki mere haathon mein sharaab rehne do

dhadkane bhi tez hain, seene mein kuch toofaan saa hai

naa hone do raat ki abhi kuch pal aur aaftaab rehne do

dil mein hai kuch baat magar main kahun to kahun kaise 

mere har sawaal kaa tum khud ko ban ke jawaab rehne do 

nashaa mohabbat kaa asar kar rahaa hai ab dheere dheere

jaadoo iskaa ab to mere dhadkano mein behisaab rehne do

band aankhon mein ek chehraa tumhaaraa nazar aataa hai

naa chhedo ki khud ko ban ke khoobsurat khwaab rehne do

sochaa hai ek geet likhun tumhaari taarif mein main aaj

aankhon ko saagar aur hothon ko khiltaa gulaab kehne do

kyaa karun taarif tumhaari, alfaaz kahaan se laaun main

husn ki malikaa ho tum, tumhe to bas laajawaab kehne do

Main apnaa ghar dhundtaa hoon

main apne hi galiyon mein apnaa shahar dhundtaa hoon
chhaaon  mile  thodi  jahaan aisi dopahar dhundtaa hoon

bhatkaa  saa  main  raahi hoon,  manzil  kaa pataa nahee
ab  main  apne  hi jeewan  kaa  sahi safar dhundtaa hoon

niklaa thaa talaash mein, dhundoo main humsafar apnaa
jo  dekhe  sirf mujhe hi, aisi  main  nazar dhundtaa hoon

gha r to  hai bas  naam  kaa, hai  sirf  deewaarein jahaan
deewaaron se zyaadaa ho aisaa koi ghar  dhundtaa hoon

jab  tak  woh  saath  the  tab  har  baat hi kuch khaas thi
aaj zindagi  hi  hai nahi main  ab  zidhar  dhundtaa hoon

mumkin nahi hai muskuraanaaa, aansuon kaa saath hai
kabhi  jeene  ki  chaah thi, ab  bas zeher dhundtaa hoon

khoyaa kuch khaas hai, magar kyaa khoyaa maloom nahi
kabhi  idhar  dhundtaa  hoon, kabhi  udhar dhundtaa hoon

Mujhe tumse mohabbat hai

tumhe dekh loon ek baar to tumhe hi dekhtaa rehtaa hoon

dil mein hai ek baat mere, main aaj tumse kehtaa hoon

khudse baatein kartaa hoon, akele main hastaa rehtaa hoon

dost mere hain bahut magar main tanhaa tanhaa rehtaa hoon

ek tumhaaraa chehraa hai jo paagal mujh ko banaataa hai

main paagalpan mein apne hi jaane kyaa kyaa kehtaa hoon

kabhi tumhaari aankhon se, to kabhi tumhaari baaton se

gum saa main ho jaataa hoon, khudko dhundtaa rehtaa hoon

tasveer tumhaari dekhun agar main hosh mein reh paataa nahi

behoshi ki haalat mein main bas tumhaaraa naam kehtaa hoon

khwaabon mein tum aati ho, kabhi aake mujhe chhuu jaati ho

tumhaare hothon ke sparsh ko main mehsoos karta rehtaa hoon

ab tak jo naa keh paayaa, main aaj woh kehnaa chaahtaa hoon

jaanaa! mujhe tumse mohabbat hai, yeh baat tumse kehtaa hoon

Main use bhulaaun kaise

ek dil hai meraa chaahne waalaa, main use samjhaaun kaise
usne to bhulaa diyaa hai mujh ko, main use bhulaaun kaise

har shaam koshish mein rehtaa hoon ki us ko yaad naa karun
par uski un mohabbat bhari yaadon se main duur jaaun kaise

koshish bahut ki maine mitaa dun har nishaani uski, magar
jo naam us kaa dil mein hai, us naam ko ab mitaaun kaise

koi paagal kehtaa hai mujhe, koi deewaana ab bulaataa hai
main to bas ek aashiq hoon, main aahsiqui bhul paaun kaise

usse pehle na chaahaa kisi ko, na baad hi chaah paayaa hoon
log kehte hain mohabbat karle, main dobaaraa kar paaun kaise

seene mein mere saansen uski hain, hothon pe hai naam usi kaa
jinke hone se zindaa rehtaa hoon, unse bandhan tod paaun kaise

meri zindagi woh, meri mohabbat wo, uske binaa main kuch nahi
wo hi nahi saath mere to main tanhaa zindagi guzaar paaun kaise

Tumse mohabbat nahi hai

naa... mujhe tumse mohabbat nahi hai
koi apnaa saa rishtaa nahi hai
bas ek sapnaa thaa jo tut gayaa
iske siwaa kuch bhi nahi hai....

kuch pal zindagi ke.. khoobsurat se..
jo tumne diye the mujhe kabhi...
bas.. un palon ki thodi si yaadein hain
aur iske siwaa kuch bhi nahi hai...

main ab tumhe yaad nahi kartaa...
nahi sochtaa main tumhaare baare mein..
yunhi kabhi chalte firte
koi chehraa tumsa dikh jaataa hai to
thodi si yaad tumhaari aa jaati hai...

kho jaataa hoon main kuch pal un yaadon me
achchaa lagtaa hai tumhe yaad kar
bas kuch pal muskuraa letaa hoon akele mein
bas itnaa hai.. aur kuch bhi nahi hai...

koi bandhan nahi hai tumse meraa...
tumse kuch bhi nahi hai meraa...
haan main sach kehtaa hoon...
mujhe tumse mohabbat nahi hai...

Ek waqt thaa

dil ki har ek baat hum tumse keh jaate the
ek waqt thaa jab hum tumhe chaahte the

tum samajhte the, humein mohabbat nahi
hum chhip chhipke mohabbat nibhaate the

tumko dekh sab kuch bhool jaate the hum
dekh dekh tumhe hum bas muskuraate the

na poochhaa tumne, na humne bataayaa ki
tumse kyun hum rozz rozz milne aate the

ek waqt thaa hum bhi mohabbat karte the
woh tum hi the jis par hum jaan lutaate the

Mujhe sataayaa naa karo

yun har baar paas aate aate duur jaayaa naa karo

duur duur reh ke mujhse tum muskuraayaa naa karo

paagal hai dil meraa kuch samajhtaa nahi tum bin

tum yun dilko ghadi ghadi bas tadpaayaa naa karo

tumhaare khilkhilaane ki aawaaz jaaduu karti hai

tum mujhpe yun jaadu saa kuch chalaayaa naa karo

band karun aankhen aur tum aa ke chhoo lo mujhe

bas khwaabon mein aa ke mujhe sataayaa naa karo

Tumhaari aankhen

tumhaari aankhon ko dekhtaa hoon to
kuch hone lagta hai mujhe... mohabbat saa...
badh jaati hain dhadkano ki tezi ..
aur badh jaati hai chaahat tumhe baahon mein bharne ki...

tumhaari aankhon ko dekhtaa hoon
to lagtaa hai kuch keh rahi hain mujhse
bulaa rahi ho mujhe apne kareeb...
machalti hain jaise tumhaari aankhen
meri baahon mein aa ke pighal jaane ko...

tumhaari aankhon kaa paani... haaye kyaa kahun main...
zindagi bhar ki pyaas ko duur kar deti hain...
koi pyaasaa jo mar rahaa ho pyaas ke maare
bas tumhaari ek jhalak unke jaan me jaan le aaye...

tumhaari aankhon ko dekhtaa hoon
to har baar kuch nayaa saa lagtaa hai....
lagtaa hai abhi abhi mili ho tum mujhse
abhi to milnaa baaki hai, kuch baat baaki hai
jee bhar ke dekh lun tumhe main....
dekh lun tumhaari nashili aankhon ko....

uuuufffff... kyaa naam dun main tumhare in aankhon ko
kabhi samundar kahun main, kabhi koi jaam kahun
kabhi sharaab ki botal kahun, kabhi main inhe shaam kahun
kyaa kyaa taarif karun main inki, sab kam hain....

tumhaari aankhon ko dekhtaa hoon main
to lagtaa hai ki main hoon hi nahi is duniyaa mein
duur kahin... bahut duur... main doobaa hoon kahin...
jahaan bas dekhne ko tumhaari aankhen hain... aur kuch nahi...

tumhaari aankhon ko dekhtaa hoon main
to mann kartaa hai ki bas dekhtaa hi rahun...
bas tumhaari aankhon ko..
bas dekhtaa rahun....

Unki yaad dilaa do

meri jang lagi kalam se aaj kuch to likhwaa do

jinko bhul chuke hain unki thodi yaad dilaa do

ek waqt thaa jab hum bas unko yaad kar likhte the

zaraa aaj fir mere dilko unki dhadkano se milaa do

bahut sannaataa hai yahaan, bilkul shamshaan saa

is andhere mein laake unhein ek chiraag jalaa do

Aankhon mein sajaataa hoon

khwaab banaa ke tumhe main aakhon mein sajaataa hoon
geet banaa ke tumhe apne honthon se gungunaataa hoon
jab zikra hotaa hai kabhi mohabbat kaa yaaron mein
main misaal ke taur pe tumhaare kisse sunaataa hoon

Apnaa thikaanaa dhundtaa hoon

main apni hi galiyon mein apnaa thikaanaa dhundtaa hoon
kitaab ke panno mein zindagi kaa fasaanaa dhundtaa hoon

koi paagal kehtaa hai, koi deewaanaa kehtaa hai mujh ko
jab khaali botal mein nashaa woh puraanaa dhundtaa hoon

log kehte hain mujh se ki main bhi kabhi muskuraataa thaa
ab apne hothon kaa khoyaa huwaa muskuraanaa dhundtaa hoon

kadam kadam pe thokrein hain, ghum hi ghum hain har taraf
jahaan bas khushiyaan ho ek aisaa aashiyaanaa dhundtaa hoon

maine koshish to bahut ki mujhe fir se mohabbat ho, magar
ab main apne hi andar chhipaa woh deewaanaa dhundtaa hoon

haaraa huwaa ek khilaadi hoon, himmat bhi main haar chukaa
thak gayaa hoon itnaa ki ab marne kaa bahaanaa dhundtaa hoon

kuch baat thi uske hone se, jo ab nahi uske chale jaane se
main apne aaj mein woh guzraa huwaa zamaanaa dhundtaa hoon