Maine teraa chehraa dekhaa

maine hazaar chehron ke bich aaj teraa chehraa dekhaa

suraj ki kiran padhte hi hote usko sunehraa dekhaa

poochhaa thaa kisi ne mujhse, ishq kitnaa gehraa hotaa hai

aankhon me tere aaj maine samundar se bhi gehraa dekhaa

zindagi me mere gham bahut hai, khushiyon ki chhayaa nahi hai

dekhaa tujhe to dekh ke meri zindagi me hote saweraa dekhaa

Meri jaan ho tum

mere aankhon ke khwaab, dil ke armaan ho tum

tum se hi to main hoon, meri pehchaan ho tum

main zameen hoon agar to mere aasmaan ho tum

sach maano mere liye to saaraa jahaan ho tum

tumse hi shuru ho ke tum pe khatam hoon main

main agar aaghaaz hoon to mere anjaam ho tum

saanson ki dor tumhaare saanson se judi hain

mere ragon mein behte khoon ki rawaan ho tum

na poochho mujhse ki mohabbat kitni hai tumse

jaanaa, dhadkane tumse hain, meri jaan ho tum

Mohabbat nibhaaun kaise

chaahatein dil me meri bhi kuch aisi hai main bataaun kaise
rokaa huwaa thaa ab tak maine khud ko par ab rok paaun kaise

nashili aankhon ko tumhaare dekh doobe jaa rahaa hoon kabse
tairnaa nahi aata mujhe, kaho khud ko main bachaaun kaise

sharaabi honth tumhaare, gulaab ki pankhuriyon se saje hain
nashaa aisaa hai inkaa ki ab madhoshi me sambhaal paaun kaise

tumse baat kartaa hoon to kuch aur yaad rehtaa nahi hai mujhe
apni ye aadat, jo tumse hai, tumhi kaho, badal paaun kaise

kuch alag hi baat hai tumme ki khichaa chaalaa aataa hoon
mohabbat ki koi moorat ho tum, main tumse duur jaaun kaise

karte hain waade log ki mar jaayenge hum tumhaari mohabbat me
mujhe to tumhaare sangh jeenaa hai, bataao naa mar jaaun kaise

Mohabbat

kar jaate hain waadaa milne kaa
karke har baar mukar jaate hain

hum karte hain intzaar aane kaa
lamhen bas yunhi guzar jaate hain

kuch jaadu hai unke naam me shayad
unke naam se hum sanwar jaate hain

dekh lete hain kabhi unhe hum to
hum bas bemaut hi mar jaate hain

mohabbat hi shayad khoobsurat hai
jo unse hum baar baar kar jaate hain

Tumhe pyaar de dun

aa jaao mere kareeb main tumhe pyaar de dun

baahon me bharke tumhe thodaa aetbaar de dun

tadap rahe ho tum mujh ko bewafaa samajh ke

aake kareeb tumhaare thodaa sa karaar de dun

Yahaan bhi kahaan hain

mile hain zakhm tumhaare dil ko

to sukuun yahaan bhi kahaan hai

tadap rahe ho tum dard-e-judaai me

to aaraam yahaan bhi kahaan hai

aansoon hai tumhaare aankhon me

to muskaan yahaan bhi kahaan hai

hum tumse judaa kab huye the kabhi jo

tumne apni mohabbat ko zakhmi keh diyaa

zakhm tumhe mile hain maaloom hai

ghaaw kam yahaan bhi kahaan hai

Guum huye jaa rahaa hoon

tumhe khoob kahun, yaa tumhaare shringaar ko kahun
main dekh ke tumhe, bas tumhe dekhe jaa rahaa hoon

baadal ko kahun, yaa fir aankhon ke kaajal ko kahun
tumhaari surmayi aankhon ko bas dekhe jaa rahaa hoon

mere saanson ki tezi bhi aaj kuch tez si ho rahi hai
ye bandhne lagi hain tumse, inse kahun to kyaa kahun

shaayad chaand utar aayaa hai aasmaan se zameen par
kabhi tumko kabhi chaand ko bas dekhe jaa raha hoon

yeh kaisaa nashaa chadhaa tumhaare roop kaa mujh par
main hoon nahi khud me, gum kahin huye jaa rahaa hoon

Alfaaz nahi milte

mohabbat ke izhaar ke liye humein alfaaz nahi milte
kahin aaghaaz nahi milte to kahin anjaam nahi milte

ummeed lagaake baithe rehte hain, jawaab nahi milte
kabhi wo nahi milte humein to kabhi hum nahi milte

wadaa karke gaye thi ki aake wo jawaab denge humein
jaane kahaan guum hain, unke koi nishaan nahi milte

aadat thi apni, pehle sapno ke mahal banaate the hum
kyun dekhen naye, kahin poore hote armaan nahi milte

Meraa waadaa hai

aadhaa sach shaayad tumhe ab bhi nahi maaloom hai
kahaan hoon main aajkal ye shaayad nahi maaloom hai

jaanke dukhi hoge, yaa shaayad khush bhi ho jaao tum
mere gharwaalo ne mujhe bahut pehle khud se alag kar diyaa tha
wajah, bas itni si thi ki maine unse baat ki thi pehle
ki tumhe apne ghar ki dulhan main banaaungaa

magar unse baat karke unko manaane ke baad
maine tumhe thukraa diyaa thaa
tumse duur bahut duur chalaa gaya thaa
wo naraz the mujhse ki maine tumhaaraa dil todaa thaa
wo tumhe apni beti maan chuke the aur maine
tumhaare saath aisaa dhokhaa kiyaa thaa

ab jaanke wo khush honge ki tum fir se meri banne ko tayyar ho
jisko unhone bahut pehle hi bahu maanaa thaa wo aayegi
unke bete ko fir se zindagi jeene ke sahi tarike sikhaayegi
bahut khush honge sab tumhaari waapasi ke baare me jaanke

jaante nahi ho tum kitnaa khush hoon main aaj
tumhe paake jaise maine saaraa jahaan paa liyaa ho aaj
naa daro, karlo bharosaa ek aakhri baar mujhpe
waada hai, tumhe itni khushiyaan dungaa
ki ek zindagi kam pad jaayegi
na daro, tumhaaraa dil tutne naa dungaa main is baar...
ye waadaa hai... haan ye mera sachcha waada hai....

Ye waadaa rahaa

main tumhe dulhan banaa ke laaungaa, ye waadaa rahaa
apne haathon se tumhe main sajaaungaa, ye waadaa rahaa
laal jode ki jo khwaaish thi tumhaari,
us khwaaish ko main pooraa kar jaaungaa, ye waadaa rahaa

tum is chand ke chhip jaane kaa intezaar karnaa
agle chaand ke nikalne se pehle main aaungaa, waadaa rahaa
baaje bhi honge, baraati honge, un sab ke saath main aaungaa
tumhe tumhaare ghar se apne ghar le aaungaa, ye waadaa rahaa

Hum bhi tumhe yaad karte hain

hawaa ke har jhaaunke se ab bhi tumhaari mehek hi aati hai
tumhaare diye laal gulaab se ab bhi mohabbat muskuraati hai

dekh ke tumhaari tasveer ko, tumhaari yaad bahut aati hai
tasveer ko naa dekhun agar main, tab bhi yaad sataati hai

bachchon ke khilkhilaane ki aawaaz ab nahi mujhe raas aati hai
phoolon se rang ude huye hain, is aangan me bahaar nahi aati hai

tumse judaa ho ke main, ab bhi judaa nahi ho paayaa hoon
sab ke bich me hi rehtaa hoon par tumhaari judaai tadpaati hai

bhoolaa nahi hoon ek lamha bhi main ab tak, sab kuch mujhko yaad hai
yaadein tumhari seene me hain, kabhi kabhi aansoo ban ke nikal aati hai...

Tum kab aaoge

 
mere diary ke panno me firse ek saal nikal gayaa
intezaar mein jeewan kaa ek aur saal nikal gayaa
aaj bhi unke intezaar me raahon ko dekhte hain
dekhte dekhte firse dekho nayaa saal aa gayaa
......
kab se kar raha hoon intezaar, jaane tum kab aaoge
aake apne zulfon ke saaye me mujhe tum kab sulaaoge
dekhtaa rahun tumhaari aankhon me, ho jaaun deewaanaa
aake apne bheege hothon se meri pyaas kab bujhaaoge

apni masoom si shaitaaniyon se fir kab mujhe hasaaoge
main ruth jaaun tumse aur aake kab tum mujhe manaaoge
mere halke se sparsh se jaise kabhi tum sharmaate the
main intezaar me rehtaa hoon ki fir kab tum sharmaaoge

maine kabhi naa sochaa thaa ki is tarhaa mujhe bhulaaoge
duur reh ke mujhse kabhi tum mujhe hi yun staaoge
thaa yakeen mujhe tumpe, ki chahe rooth jaaye zamaanaa
tum ho mere, mere rahoge, kabhi naa mujhse rooth paaoge
 

Nayaa saal

hum sab ke dil me sabke liye bas pyaar aaye
sabhi ki zindagi me khushiyon ki bahaar aaye
kisi ko kisi baat ka ghum na ho, dard naa ho
muskaan chehron pe laut ke baar baar aaye

jo judaa huye hain, unhe unkaa humsafar mil jaaye
jo bhatak gaye hain raah se, unhe raah mil jaaye
koi deen aisaa naa ho jo bhook se tadap rahaa ho
har insaan ko har insaan me hi bhagwaan mil jaaye

khatam ho jaaye nafrat ki aag dilon se hameshaa ke liye
koi mile apne dushman se bhi to haske gale lag jaaye
naa koi dil tute mohabbat me, naa koi bewafaa kehlaaye
kare koi mohabbat to use mohabbat me jannat mil jaaye

Aao naa

 

aao naa fir se ek baar mil ke hum logon ko jalaate hain
jaisa pehle machaate the, kuch waisaa dhoom machaate hain
tum mere sawaalon ke jawaab denaa, main naye sawaal poochhun
in sawaal jawaabon se hum apne rishte ko aage badhaate hain

kuch tumhaare dil kaa haal sunte hain, kuch apni sunaate hain
hum poore din chalo fir se sirf ek dusre me kho jaate hain
bhool jaate hain fikra saari duniyaadaari ki chalo hum
aur hum sab kuch chhod ke firse ek dusre ke ho jaate hain...

Deewaanaa kar jaayegaa

jhaaunkaa hawaa kaa koi jab tumhe chhed jaayegaa
raat ki tanhaayi me tumhe woh bahut yaad aayegaa

yeh dil to paagal hai, kisi par aa hi jaayegaa
laakh sambhaalo tum, yeh dil naa sambhal payegaa

dhadkegaa yeh betahaashaa kisi ki yaad mein harpal
aur samjhaane par bhi yeh dil naa samajh paayegaa

aasmaan ke chaand ko dekh yeh muskuraayegaa, aur
apne chaand ke deedaar ke liye ye tadaptaa jaayegaa

aayegi milan ki raat kabhi, jab sanam baahon me honge
us raat ke intezaar me dil harpal pighaltaa jaayegaa

kaise rok paaoge tum is dil ki beqaraari ko
dil to deewaanaa hai, tumhe deewaanaa kar jaayegaa

Main deewaanaa hoon

main deewaanaa hoon, mujhe deewanaa hi rehne do
tum saansen ho meri, tumhe mohabbat hi kehne do

tumhaare aane se yeh shaam meri haseen ho gayi hai
meri har shaam ho tum ab yun haseen hi rehne do

banjar baagon me dekho ab aane lagi hai bahaarein 
har gulaab ko ab tum hameshaa khilaa hi rehne do

tumhe dekh titliyaan bhi rang bharne lagi hain
un titliyon ko ab tum indradhanushi hi rehne do

aaj dil me  mere kuch umange si uth rahi hain
jaanaa, dil ke umangon ko aaj berok hi behne do

kehnaa jab bhi chaahaa maine, tumne rokaa hai mujhe
haseen hothon ko apne tum apne hothon pe hi rehne do

main kehnaa chaahtaa hoon bahut kuch tumse aaj jaanaa
mujhe geeton me sajake aaj har ek baat tumse kehne do

saanson ka bandhan tumse, dhadkane bhi tumhi se hain
tum jaan ho meri, jaanaa tumhe meri zindagi hi kehne do