Aajao naa

arsaa ho gayaa tumhe seene se lagaaye huwe

aao naa, ek baar nazar ke saamne aajaao naa

tadap rahaa hoon main, sholon par chal rahaa hoon

aake bas ek baar is agan ko bujhaa jaao naa

aao naa, meri jaane jaanaa, bas ek baar aajaao naa

dekho naa kab se baarish tak nahi huwi yahaan

sukhi hai yeh zameen saari, aur meri zindagi bhi

bas ek tumhaare naa hone se kuch bhi baaki naa rahaa

pyaasaa hoon, aake meri pyaas ko bujhaa jaao naa

aao naa, bas ek baar aake seene se lag jaao naa

jaante hain hum bhi ki humein bhulaa chuke ho tum

duur, bahut duur jaa chuke ho tum hamaari yaadon se

is paagal dil ko hamaare aake ek baar samjhaa jaao naa

koi wajah naa sahi, kisi bahaane se hi aajaao naa

aao naa, meri jaanaa aake fir mere ban jaao naa

aao naa, aa jaao naa, meri jaanaa, aa bhi jaao naa...

Aaj bhi hai

in aankhon se behte huwe ashkon ki rawaani aaj bhi hai
hothon pe hamaare adhuri si woh ek kahaani aaj bhi hai

kyaa bataayein hum kisi se ki kyaa huwaa saath hamaare
bheegi si hawaayein aur baarish ka woh paani aaj bhi hai

thi woh kaagaz ki ek kashti jo doobi thi samundar mein
saahil pe samundar ke, cheekhon ki nishaani aaj bhi hai

saayaa apnaa hi thaa chhootaa hamaare jism se jis din
kyaa huwaa haal, hamaare geeton mein bayaani aaj bhi hai

sach to hai ki unke chehre ko bhoole hi nahi hum aaj tak
bich panno ke kitaabon mein, tasveer puraani aaj bhi hai

Kyaa bataayein hum aaj

tumhaare ehsaas kuch is tarhaa gudgudaa jaate hain jaise baarsh ki koi boond ho, maathe se tapak ke hothon tak aa jaaye, ek alag hi ehsaas... uuuufff kaise bataayein hum, tum hi kaho kaise bataayein...


tumhaari yaadon kaa asar chhipaayein ki bataayein hum aaj
dhund len hum khud ko tumhi mein ki kho jaayein hum aaj

yun to dhundne se nahi mil paate hum kisi ko zamaane mein
kyun aaye hain laut kar, kisi ko kyaa samjhaayein hum aaj

failaake baahein mehsoos kar lete hain tumein hawaaon mein
karke yaad tumhaari har puraani baat jhoom jaayein hum aaj

woh tumhaaraa muskuraanaa, tumhaaraa phoolon saa sharmaanaa
soch kar har woh baat tumhaari dekho muskuraayein hum aaj

jaanti to tum bhi ho ki door nahi hain hum tumse ek pal bhi
keh do tum to haqeeqat mein kareeb nazar aa jaayein hum aaj

Kasak to dil mein 'Hriday' ke hi rahi barson se jawaan
mehsoos bas kar ke dekho, ragon mein daud jaayein hum aaj

Mujhe chale jaane do

main shaam kaa kaalaa baadal hoon
mujhe hawaaon sangh chale jaane do
main rahungaa to bas dard dungaa
bahut duur mujhe ab chale jaane do

naa roko mujhe ab, na toko mujhe ab
mujhe dur chale hi jaanaa hai
main ghum ke sabhi kaa ek kaaran hoon
mujhe duur ab chale jaane do

ban kaantaa ghulaab mein rehtaa hoon
ban zeher sharaab mein rehtaa hoon
mere hone se bas nuksaan hi hai
naa roko mujhe, mujhe chale jaane do

har shaks ki aankhon mein khaltaa
hoon aag nahi fir bhi jaltaa
main ghaaw bhi hoon, main dard bhi hoon
mujhe duur ab chale jaane do

garam ret kaa koi kann hoon main
dard bharaa ek khsann hoon main
mere hone se kisne kyaa paayaa
main vyarth hoon, mujhe chale jaane do

naa pyaas bujhe, woh saagar hoon
naa raahat de, woh baarish hoon
mujhe jal ke raakh ban jaanaa hai
mujhe jaanaa hai, chale jaane do...

Ek pal hoon tumhaaraa

aaj baras jaao ji bhar ke, ki main baadal hoon tumhaaraa
sajaalo mujhe aankhon mein, ki main kaajal hoon tumhaaraa

koi shayar mujhe kehtaa hai, to koi kahe mujhe deewaanaa
jaanti to sirf tum hi ho, ki main bas paagal hoon tumhaaraa

meheki si yeh hawaaein bhi, aur mehkaa saa samaa bhi hai
hawaaon sangh udd jaataa hoon, main aanchal hoon tumhaaraa

hansti raho, gaati raho, ki lamhaa yeh mohabbat bharaa hai
pehle chaahe jo bhi huwaa ho, main aaj kal hoon tumhaaraa

dhadkan meri tumse hi hai, tum hi meri jaan bhi ho jaanaa
main hoon hawaa kaa jhaunkaa, bas ek main pal hoon tumhaaraa

Aisaa mausam de gaye

hothon par hansee aur aankhein nam de gaye
woh jaate huwe jaane kaisaa mausam de gaye

sooni si raahon par ab tanhaayiaan hi hain
bas pal do pal kaa saath woh sanam de gaye

mere ghaawon par pyaar se woh haath ferkar
sau janam ka dard woh bas is janam de gaye

le gaye chhin kar hamaari har khushi humse
tohfey mein umar bhar kaa woh ghum de gaye

denaa hi thaa kuch to de jaate maut humein
par woh to bas muskuraane ki kasam de gaye

Pighalne to do naa

saanson ki garmi mein thodaa aur jalne to do naa

jaadu mohabbat kaa kuch der aur chalne to do naa

yeh baahon ki garmi, haan yeh zulfon ki khushboo

baahon mein aake khudko zaraa pighalne to do naa

kabhi tum sambhaalo, kabhi tumhein hum sambhaalein

kabhi ladkhadaane do, kabhi tum fisalne to do naa

hamaaraa dil to beheltaa hai tumhaare ehsaas se hi

reh ke kareeb dil ko thodaa aur behelne to do naa

yeh geeli si baarish, aur yeh bahaaron kaa mausam

machaltaa hai dil apnaa, thodaa machalne to do naa

chaahat hai is dil ki, bas tumhe paanaa hai jaanaa 

ab is chaahat ko mere dil mein tum palne to do naa

bas abhi to yeh mausam kuch suhaanaa saa huwaa hai

chale jaanaa, tum mausam ko thodaa badalne to do naa

Lajawaab tu hai

dil ke har ek sawaal kaa, sirf ek jawaab tu hai
haqeeqat hai, yaa fir khoobsoorat khwaab tu hai

aankhon mein nashaa tere, jism mein khushboo hai
hothon se lagaaloon jise aisi koi sharaab tu hai

nazar kisi gair ki tujh par kabhi pad naa jaaye
kitaab ke panno mein chhipaa koi ghulaab tu hai

cheez bhalaa kyaa hai tu, kyaa teri taarif ho ab
tujh ko main chaand keh dun, yaa aaftaab tu hai

ragon mein khoon bankar, jism mein hai jaan bankar
dil mein mere rehti hai tu, ehsaas lajawaab tu hai

Tujhe Kyaa Inaam Dun

kyaa tohfaa tujhe main aaj ki haseen shaam dun

keh dun bahaar tujhe yaa main koi aur naam dun

kaanpte geele lab tere jo kareeb aajaayen mere

main un labon ko tere apne labon kaa jaam dun

tadap badh jaaye jab tere dhadkano ki kabhi 

seene se lagaa kar apne main tujhe aaraam dun

umar bhar baithaa rahun tere nazar ke saamne

apni nazron ko bas tujhe dekhne kaa kaam dun

koi haseen ghazal likh dun naam par main tere

yaa bas ishaaron se hi tujhe koi paighaam dun

dene ke liye tujhe chaand bhi tod kar laa dun

tu hi bataa de tujhe main aaj kyaa inaam dun...

Kyaaa kahun

kuch likhaa nahi arse se, aaj kuch likhne kaa mann ho aayaa

liyaa kaagaz kalam haath mein to, chehraa teraa nazar aayaa

maasoom si teri do aankhein, un aankhon kaa kyaa kahun

guzri hain jo teri yaad mein, un raaton kaa kyaa kahun

achchaa lagtaa hai teri tasveer se baatein karte rehnaa

kyaa mazaa hai, kyaa bataaun, un baaton kaa kyaa kahun

bheeg jaataa hoon aksar main tere hone ke ehsaas se hi

main mujhe bheegaane waali un barsaaton kaa kyaa kahun

yaad aati hain ab bhi tujhse hui woh mulaquaatein meri

chhip chhipke tujhse hui un mulaaquaaton kaa kyaa kahun

teraa sharmaanaa, teraa yunhi khilkhilaa kar has denaa

uuufff tujh sangh mehsoos kiye ehsaason kaa kyaa kahun

band aankhon se sirf tujhe hi mehsoos kiyaa har jagah

jab jab dikhaa teraa chehraa un khwaabon kaa kyaa kahun

shuru karun to kabhi khatam hi naa ho woh daastaan apni

dil mein chhipaa teraa naam, teri yaadon kaa kyaa kahun.....

Wish you a very Happy Valentine's Day.

Mujhe mohabbat hai

tum ho nahi khwaab, main yeh kaise aetbaar karun

choo loon tumhe, ki ab kuch aur mere yaar karun

aajaao kareeb, main bhar loon tumhe baahon mein

jee bhar ke tumhi se ab, jaanaa main pyaar karun

kho jaaun ab shaam si ghani zulfon mein tumhaare

doob ke aankhon mein, un aankhon kaa deedaar karun

paagal banaati hain mujhe, nashili aankhein tumhaari

rok loon khud ko, to kabhi khud ko hi beqaraar karun

naam jab bhi aaye meraa, tumhaare naam ke saath aaye

dil kyaa cheez hai, main jaan bhi tumpar nisar karun

poochhte hain log ab wajah mere badle huwe andaaz ki

keh dun mujhe mohabbat hai, yaa ab bhi inkaar karun

Kyaa baat ho

yunhi kabhi chalte chalte woh mil jaayen to kyaa baat ho
zindagi mein fir ek baar unse mulaquaat ho to kyaa baat ho

hum to jee rahe hain hamaari zindagi bas jeene ke liye hi
humein jeene ke liye koi maksad mil jaaye to kyaa baat ho

hawaayein aaj bhi waisi hi hain jaise pehle chalaa akarti thi
magar in hawaaon mein mehek unki ghul jaaye to kyaa baat ho

thak gaye hain hum sooni si deewaaron se baat kar kar ke
koi hamaaraa bhi haal hum se aake poochh le to kyaa baat ho

chal rahe ho hum anjaan kisi raah par aankhein jhukaaye
nazar uthaate hi unkaa chehraa dikh jaaye to kyaa baat ho

khuli zulfen, gulaabi honth, sharbati aankhen nahi maangte
bas ek ehsaas hi ho unke kareeb hone kaa to kyaa baat ho

aadat chhoot gayi hai likhne ki unke chale jaane ke baad
humein fir se koi aake likhnaa sikhaa jaaye to kyaa baat ho

badi sooni hai zindagi hamaari ek unke chale jaane ke baad
kaash woh aake hamaari baahon se lipat jaayen to kyaa baat ho

Main fir deewaanaa huwaa

barson baad jo teri yaadon kaa aanaa huwaa

chhalaktaa saa aankhon kaa paimaanaa huwaa

koshish ki rok len boondon ko aankhon mein

par boondon kaa bas yunhi beh jaanaa huwaa

jinhe dil ke sandook mein band rakhaa thaa

un yaadon kaa, aaj achaanak hi aanaa huwaa

naa koi dastak naa hi koi aawaaz di unhone

aa ke meri khaamoshi ko chhed jaanaa huwaa

yaad aayi woh teri gehri do aankhein humein

un aankhon mein hamaaraa doob jaanaa huwaa 

dhundte rahe hum saahil ko majdhaar mein 

aur saahil se meelon dur chale jaanaa huwaa

khoye kuch is tarhaa hum teri yaadon mein

hamaaraa firse khud ko bhool jaanaa huwaa

khud ko badal ke insaan banne chale the hum

'Hriday' firse tere kaaran deewaanaa huwaa

Dil ki baat

kuch ehsaas dil ke dil mein dabe reh jaate hain
chaahkar bhi hum zubaan tak laa nahi paate hain

kabhi bandhan zamaane ke humein kehne dete nahi
kabhi hum apne andar ke dar se hi dar jaate hain

samjhaate rehte hain dil ko ki wo hamaaraa nahi
dheere dheere haqeeqat se duur chale jaate hain

jisko kabhi dil ki baat bataa paaye hi nahi hum
dekh uski tasveer bas yunhi khush ho jaate hain

Koshish

himmat se log tooofaan mein kaanch kaa mahal banaa lete hain
thodi si koshish se log apnaa sunehraa kal banaa lete hain
ek haar yaa ek jeet ko soch kar zindagi naa guzaaro yaaron
aise bhi hain insaan jo khoobsurat apnaa har pal banaa lete hain...

Kuch aisaa kaam kijiye

deewaane dil par bas itnaa saa ehsaan kijiye
jaate jaate aap mudke humein bas dekh lijiye

aankhon ki masti ko dekh reh lenge raat bhar
aap dil kaa qaraar aur hamaaraa chain lijiye

geele labon kaa nashhaa sharaab se kam kahaan
bas ek baar hothon kaa aap humein jaam dijiye

naa rakhiye baandhkar yun apni ghani zulf ko
kholkar zulfon ko apni din mein shaam kijiye 

deewaane hain hum aapke husn ke jaan-e-jaan
is deewaane pe aap bas itnaa saa ehsaan kijiye

naa jaayaa kijiye humein yun chhodke roz shaam
hum aapke hain, aap hamaaraa haath thaam lijiye

do pal, do ghadi ke saath mein ab mazaa kahaan
zindagi bhar kaa aap humein koi inaam dijiye

chaahe saansen lijiye, lijiye zindagi hamaari
aake hamaari baahon mein dil ko aaraam dijiye